立場新聞 Stand News

藝術嘅嘢我識條......春

2016/5/25 — 20:39

Pop Art 之父 Andy Warhol 的毛澤東畫像

Pop Art 之父 Andy Warhol 的毛澤東畫像

文謅謅的話,應該寫成:藝術這回事,我懂什麼。放心,既然是寫facebook的話,口語化一點、低俗一點,應該無妨。藝術嘅嘢,我識條撚咩,我唔識藝術,所以我寫經濟。

Pop Art之父、美國Andy Warhol嘅毛澤東畫像,係新加坡、香港、東京算是藝術品,但到了北京、上海卻不算藝術品,講嘅是2013年Andy Warhol作品亞洲巡迴展,去到上海、北京站時有8幅作品被抽起,包括劉鑾鴻用超過1億元買嘅毛澤東畫像。藝術定偽術?視乎當權者點樣詮譯,一個唔好彩,當權者係立法會議員陳鑑林的話,但凡涉及政治嘅都唔係藝術品。

廣告

核心價值近年經常被掛在嘴邊,點解?因為一來怕大家忘記,二來怕大家從未學過,前者講舊香港人,後者講新香港人。點解讓坐要講明讓坐?排隊要講明排隊?我哋嘅社會近年受到各方面的衝擊,由傳媒、司法、教育無一倖免,當然包括文化及藝術創作界別,特別是中國習慣牢牢控制咁控制意識形態。

西方社會中,政治同藝術融為一體,法國宮廷畫家Jacques-Louis David將矮仔拿破崙畫到英明神武方便四出征戰涉唔涉及政治?古希臘作家Aeschylus創作嘅《波斯人》(The Persians)講述薩拉米斯戰役又涉唔涉及政治?

廣告

不過去到封建人治嘅中國就唔係果回事,簡單問句,大家有無發覺好少見到中國畫龍嘅畫?少見除咗因為虛構嘅龍難畫外,重要嘅原因係龍為帝王或統治階級專有,封建制度下等級森嚴,一般百姓唔會畫龍,係中國任何環節都涉及政治。

作者製圖

作者製圖

香港回歸19年,文化及創作處處受到制肘,圖三幫大家回帶,睇到政府近年係藝術創作上嘅全方位干預,包括香港芭蕾舞團嘅《紅樓夢夢紅樓》中的一幕文革戲被刪、糊塗戲班的「去國立」事件。

《從現在開始,我們就是六十秒的朋友》係兩位藝術家𧶽予、嵌入額外嘅創作理念後被「下架」,事件涉唔涉及政治?無論事件涉唔涉及政治干預,政治凌駕創作係《十年》後已經無所遁形。

南韓曾經係封建獨裁嘅社會,上世紀60至80年代即使女士著短袖衫上鏡都備受批評,但亞洲金融風暴後南韓痛定思痛,上世紀末定出「文化立國」嘅國策,除咗訂立《文化產業振興基本法》、《文化產業發展推進計劃》及《文化產業前景21世紀》等法律或政策外,亦設立文化產業振興院(KOCCA)以及韓國貿易館(KOTRA)去振興經濟,制定相關政策之餘亦減少政治干預。作者孔枝泳的《熔爐》被改拍成電影《無聲吶喊》、電影《星級殺人犯》都有講到南韓嘅社會不公平與政治。

南韓嘅痛定思痛結果有目共睹,韓流(Hallyu)成為新英文單字,經濟貢獻更加明顯。

作者製圖

作者製圖

作者製圖

作者製圖

同大家睇下啲唔會呃人嘅數據,1998年至2015年間,南韓只有2008年出現132億美元的貿易逆差(即是出口少於入口),其餘時間均取得貿易順差,出現貿易順差與文化出口有關。圖四顯示2012年南韓文化產業對經濟的貢獻及分佈。大家可以看到出版佔24%,至於電視電台廣播方式佔14.182萬億韓圜,佔16%,當年來自文化產業的貢獻達到87.27萬億韓圜,以今天的匯率計即是737.8億美元。

南韓在2012年錄得282.85億美元貿易順差,根據KOCCA的數據顯示,當年文化產業貢獻了29.37億美元順差,即是約10%貿易順差來自文化產業。大家在睇《太陽的後矞》時其實已送緊錢俾南韓,係咪好神奇?

政府經常講經濟轉型,有時唔係得個講字。而家唔少藝術家或創作人士都會向政府申請基金,其實而家政府有好多唔同基金,包括1)藝術發展基金、2)香港藝術發展局資助計劃、3)創新及科技基金、4)創意智優計劃、5)電影發展基金以及6)電影貸款保證基金等等,唔同基金又由唔同局負責,例如1同2由民政事務局負責(局長係劉江.....華),3至6則由商務及經濟發展局負責(局長係蘇錦樑)。即係話唔同局對唔同作品有唔同嘅睇法,Andy Warhol嘅毛澤東畫像係民政事務局涉及政治,商經局可能唔涉及。

作者製圖

作者製圖

作者製圖

作者製圖

文化及創意產業係香港GDP嘅貢獻同旅遊業差唔同,大約5%,但係文化及創意產業以及旅遊業係2014年涉及的從業員分別係21.31萬人以及27.18萬人,反映文化及創意產業係香港屬於高增值行業(1個打3個),香港如果要轉型,發展文化創意產業係上上之選。

其實香港好多發展文化創意產業的人才,可惜政府偏偏要整把刀係藝術家創作家條頸上?

 

文章原刊作者facebook

發表意見