立場新聞 Stand News

藝術市場咁樣樣?少年畢加索,真慈善定玩剝削?

2017/8/11 — 12:17

作者製圖

作者製圖

琴日《立場》報道有個畫畫好叻嘅難民細路,被封為「少年畢加索」。得嗰十歲人仔就開個展,真係叫好多做藝術嘅人羨慕唔嚟!我側邊嗰個叫我睇吓單新聞,成件事好有愛咁話。但我一睇就覺得唔對路,點解一個阿富汗難民做展覽,要將作品收益捐俾個塞爾維亞細路?

首先,一個細路畫畫靚都未必有人咁多人識。但因為佢係難民,而佢流落歐洲都無放棄畫畫,仲要俾個美國佬明星發掘咗佢,所以外媒就捧紅佢做咗「少年畢加索」。我睇佢啲都覺得好厲利,一個細路畫到咁嘅程度,的確幾唔錯,抓到啲人物嘅神緒。但都係模仿多,無乜自己嘢,反而佢晝難民營嗰張仲有特色啲,排緊難民隊嘅唔係普通人,有懷疑奧巴馬,仲有懷疑金正恩。

Anyway,問題嚟嘞!塞爾維亞嘅難民組織搵「少年畢加索」做展覽,如果話係幫難民籌款,我覺得成件事好合理喎。一個難民畫嘅晝,賣咗幫返難民佢地,不知幾有自力更新嘅意義,簡單一百分勵志!偏偏佢地又唔係咁做,反而借難民嘅畫,幫一個塞爾維亞腦癌細路籌錢。難民本身都好多問題未解決,所謂「泥菩薩過江」,喺呢個情況下就顯得更加奇怪。

廣告

剝削!

我腦海即刻浮起呢兩個字。難民喺歐洲成堆人球咁,無人想要,就係人都知。阿「少年畢加索」喺塞爾維亞都係住得嗰八個月,而且係未正式入籍落戶,仲係住喺難民營。無利用價值嘅時候,佢就係難民;可以出賣嘅時候,佢就係畫家,就係「少年畢加索」。搞手根本就喺度消費呢個細路!捧紅佢,賺盡佢,然後送走佢,同娛樂圈做星根本無分別!

廣告

睇吓外媒探訪佢展覽開幕影嘅相,「少年畢加索」好似陳雲咁戴草帽,仲要戴埋副超,成個人同幾個月前唔同勁多。你就知道佢幕後幾多人幫手做 branding,得嗰十歲就已經好偉大,講愛心跨國界,話唔想其他細路「活於驚怕之中」,所以要捐作品救細路。仲要唔好忘記,佢學咗英文先嗰一年,可以表達到有幾複雜嘅內容?有幾反映到佢難民流徙嘅經歷?恐怕十分三都無,好好聽嘅話說,好靚嘅外表,一切都係做出嚟。睇見,都咪話唔心寒!

你以為只係難民先會被消費。少年,你太天真!香港都不知有幾多例子,藝術家小道大道都聽唔少。

大道就 2015 年第一次搞嘅「新藝潮」,主打做藝術學院新進博覽,好似俾機會後生,但實際就食住學生畢業急住入行嘅心態,樣樣收費樣樣貴。借學生過橋,純粹消費吓學生新進咁。難怪當時林嵐老師都話個展好似做好心,實際上就一盤生意,樣樣講錢賺到盡。學生初哥好多嘢都唔知頭唔知路,於是就好似被人呃咗上船咁。

小道呢,大名 artist 都一樣有消費嘅煩惱,咁當然佢哋嘅情況會比較接近「互相利用」啦。你捧紅我,大家賺多啲。做多幾年,愈來愈紅,愈來愈多 job。無乜時間空間諗真嘢,做嘢開始重複,來來去去咁樣樣。一係被市場叮走,一係你自己醒目提早離場。藝術市場就係咁樣樣,市場嘛,就係明買明賣,你唔係俾錢嗰個,就係俾人賣起嗰個。收藏家、藝廊、藝術家,藝術品,其實都係同一條 production line 上嘅工人。

我知,我梗知個遊戲就係咁玩,但唔知「畢加索弟弟」明唔明佢已經被參與呢個遊戲?

發表意見