立場新聞 Stand News

藝術落地必殺技

2016/8/26 — 14:03

今時今日,仍然有好多人覺得藝術好離地。藝術嘅嘢,個個都話自己識條鐵。香港地做創作人應該都好頭痕,點樣可以又做到自己想做嘅嘢,又有人肯嚟睇呢?唯有搵啲香港人最有感覺嘅嘢,知唔係「土地問題」囉!

下個月頭有部話劇,叫做《攞命樓主》,打正旗號,講香港人熱衷於「上車」呢個遊戲。宅男節衣縮食只為儲錢俾首期,同心目中嘅女神雙宿雙棲;被愛人拋棄嘅男神,傷心欲絕,賣樓重新奮鬥。一個想買,一個想賣,最後到底會點?

廣告

無獨有偶,浸會大學有個學生為畢業作品搞緊網上眾籌,套嘢叫《蝸居 + 鉛》,開宗明義,講香港人蝸居,又有鉛水問題,生活真係閉羿。兩小口有層樓已經好唔容易,個老公仲要驗到中咗鉛毒,個未出世嘅 B 都唔知點算?

廣告

如果就咁叫人入劇場,睇套《羅密歐與茱麗葉》,好多人應該又叫悶,又叫老套,一定大把人覺得關我乜事。又或者叫你捐錢,撐一個學生拍佢嘅畢業作品,佢拍咩黑澤明風格,大家總係一盤冷水潑埋去,「捱多十年都未到你啦,黑澤明!」

套劇講買樓喎,唔係自己儲緊錢買,身邊總有一兩個成功人士,已經有樓揸手。樓,一定係共同話題。唔明藝術係乜,唔緊要,最重要係你知道咩係土地問題。咪就係咁囉。有啲創作人,為咗多啲人明,揀啲極其低地嘅題目。好未?藝術唔係高高在上,而係關於生活㗎!

知但係咁,共鳴還共鳴,如果只係將觀眾每日面對緊嘅土地問題,喺個台度演一次係無意思㗎!好似上次油街嗰個咩「北角買樓團」,又係講土地問題,迫啦,迫啦,同好迫啦,都無乜咩新嘢推到出嚟。成牆都係 memo 紙,好 engage 到觀眾喎。係咩?只係大家怨氣太大,你俾咗個機會佢哋抒發咗出嚟咋。咩反思空間問題?唔多覺囉。

好似今次嗰兩套嘢,未睇評論唔到,但我好希望佢哋,唔好只係再做一次,我哋每日面對緊嘅問題,嗰啲悲慘情節我哋都好清楚啦,唔駛交代咁多。唔該,用多啲心力同時間,真係去諗吓,劇情上面可以有咩突破啦。我哋宜家之所以係個困局入面,正係因為我哋無突破呀!藝術,係應該有突破嘅!

發表意見