立場新聞 Stand News

M+設計展之以為去錯 IKEA

2016/12/4 — 11:18

西九又有新展覽,今期無咗 Art Centre 嘅 Art Bus,西九自己出 shuttle bus,半個鐘頭一班,總算係誠意可加啦!星期六,無乜嘢做,同側邊嗰個去行個轉。見到個展亭拆咗之前曾建華啲,露出返白嘥嘥嘅真身。側邊嗰個問:睇怕 M+ 都未開幕,展亭都變咗色。

講返個展覽。之前係香港睇設計展覽,好多時都係去文化博物館。印象中,文化博物館的設計展,都不是好好睇。海報三年展嘅作品係有質素嘅,但無乜咩策展可言,只不過係按照比賽類別嚟擺。最近的劉小康設計展,我都係覺得麻麻地,係見到 Freeman Lau 咁多年以來做咗好多嘢,但用合作嘅唔同機構分類,策展都係無乜誠意。

今次 M+ 設計藏品展,可以話係繼承咗政府大堆頭嘅作風。三千呎空間,放咗 120 件展品。展區分類,其實都仲係好傳統,地區同時代,但區與區之間嘅關係唔夠明顯。成個展覽睇起嚟,睇唔到咩主題。可能主題根本唔係佢哋嘅考慮啦,佢哋係想「展示收藏成果」嘛,所以多就係好,話你知:我無嘥納稅人啲錢㗎,你睇,我哋買咗幾多嘢~~~

廣告

多,可能係其中一個「成果」;但作為一間博物館,係咪應該行多步,話俾我哋呢啲唔曉藝術嘅大眾,究竟你啲藏品有幾勁先?一入個場,我側邊嗰個就話喇:咦?典解有電飯煲嘅?嘩!仲有電視添喎!行咗一個轉,好多嘢都係家品嘢,衣櫃、枱櫈、燈......我以為自己去錯 IKEA,只係分咗日系/印度風/大陸紅色革命 style/老香港味。

廣告

拿,又 fair 啲,佢係有本小冊子嘅,叫「設計可以___」,揀咗其中九件嘢,解釋吓佢哋反映到設計有咩用途。來來去去都係嗰啲咩:改善生活/身份認同/建立關係/實驗性,乜乜乜乜。大佬啊!我用毛澤東𠺘口盅嘅時候,唔會諗到咩身份認同㗎,對於 user 佢只係一啲 political product。咩「設計用途」,係從 research 角度去睇去分類,但一般觀眾真係理得你設計可以點,最緊要靚!好睇又好用,就係最好嘅設計,點解要搞到啲簡單嘢咁鬼複雜?

仲有後現代嗰 part,簡直係崩壞!明明用開地區時代分類嘅,突然爆個跨時代地域嘅後現代出嚟。喂!後現代係好闊,但唔係 uncategorized 就咁放埋一齊囉!Design chair 係後現代,航拍機又後現代,電子狗都係後現代!認真。如果你係有心講後現代,咪無啦啦最後加一忽啦。另外做一個展覽,都可以講唔完。

之但係咁,後現代嗰 part,有件展品係值得講值得 sell,但無人理嘅。就係 NTT DOCOMO 嘅 emoji 喇!話說呢舊嘢早排美國 MOMA 都買咗,M+ 同 MOMA 挑選有類似嘅 taste,唔係就睇得出你有幾貼近國際藝術潮流咩?好好咁講一件作品,好過你曬冷 120 件,但都唔知你想做乜啦~

要證明自己有幾勁,嘢唔洗多㗎,一件就夠!官僚,你懂嗎?

發表意見