立場新聞 Stand News

M+ 展亭,落成未啟用?

2016/7/27 — 18:32

連傾連起,搞咗十幾廿年嘅西九文化區,上個禮拜,終於出咗第一舊「硬嘢」。M+ 展亭終於起好,但又非常之曖昧咁,媒體一致只係用「落成」,而唔係「啟用」。究竟 M+ 展亭,「啟用」咗未呢?

M+ 展亭上周五「落成」,但首個展覽要等到九月先舉行,中間呢個幾月,我哋可唔可以去參觀吓呢?一般市民係咪可以「擅自闖入」,我就唔清楚喇。不過,近日我就聽講有藝術團體想用 M+ 展亭,向西九中人查詢實地考察的安排。對方語帶保留,客客氣氣地婉拒咗。如果連藝術團體都入唔到去,我睇我哋呢啲普通市民,就更加無機會喇。

一棟嘢,落成咗又唔啟用,又有咩意思呢?嗱!說話又唔係咁講喎。落成開 party,展覽好鬼遲,幾個月前立場報導過,巴勒斯坦都係咁!

廣告

用咗差唔多兩億港紙起好嘅巴勒斯坦博物館,今年五月「落成」,但首場展覽竟然係半年之後嘅十月先舉行。博物館仲話,落成要開 party,係要「慶祝博物館大樓如期落成」,博物館空無一物,都硬是要「開」。

諗返起上嚟,M+ 展亭落成嗰日,西九都好強調「如期無超支」。真好笑。做一單工程,如期交貨,合乎預算,唔係好應份嘅咩?係咪咁都要走出嚟,打鑼打鼓咁慶祝啊?

廣告

又咁講,巴勒斯坦嗰邊,未有展覽啲市民都可以享用戶外設施,咁香港嘅 M+ 展亭呢?嗰個小小草地,仲有嗰個百萬維港海景嘅露台,又有無我哋份?落成典禮嗰日,栢志高話咩「M+ 展亭是屬於所有人的空間」。究竟佢口中嘅「所有人」係啲咩人?

發表意見