立場新聞 Stand News

致欣宜:我之前八年真係冇討厭過你,直到今年 ...

2017/1/4 — 18:51

鄭欣宜(叱咤2016頒獎禮截圖)

鄭欣宜(叱咤2016頒獎禮截圖)

【文:阿爽】

其實真係好討厭同睇到好厭,最後一次評論同埋比你出現喺我嘅Timeline。

其實,而家冇人會講謝霆鋒係謝賢個仔,只有人講謝賢係謝霆鋒老豆。因為謝霆鋒有嘅係成就,唔係老豆。

廣告

其實呢個世界肥嘅唔靚嘅但歌好聽嘅唔少,出名嘅有Adele,唔出名嘅有大把黑人女歌手。Adele都肥過,而家都仲肥緊,但佢紅嘅歌係Sky Fall、Rolling in the Deep、Hello、Someone Like You,冇一首同佢個身型有關。大家只會提佢嘅歌聲,好少提佢嘅身型,就算提佢都只係一笑置之而唔會長篇大論講哭崩長城咁講自己有幾Chur有幾大壓力,因為人地唔會賣弄呢樣野,而係賣弄歌藝同實力。

廣告

Taylor Swift係靚,但我超討厭佢,因為佢同欣宜一樣,都係賣弄、消費。Taylor Swift唱來唱去都係唱嗰啲少女懷春愛得有幾深分手有幾痛苦嘅歌,但係自己每三個月都換一個男朋友而且仲要攞佢地來寫歌來賣,呢啲就叫做消費、消費緋聞、消費感情(if any)、消費同佢拍過拖嘅人。而欣宜就係自己嘅脂肪。你唱你阿媽可能我仲會覺得感動。

呢個世界肥但係成就好高嘅女人唔少。我舊公司一堆老細都係肥婆,但係人地係Director,大家只會提及佢地嘅事業、湊客技巧、談吐、管理風格同埋專業,從來都冇人提及過佢地嘅身型。唔好忘記仲有默克爾同戴卓爾夫人,佢兩個磅數都唔少。唔係唔敢提,而係根本唔值得提,因為影響唔到佢地嘅價值。攞住自己嘅身型做借口,係Loser嘅行為。攞自己嘅身型做賣點,如果用你呢個方法,係更Loser嘅行為。

肥或醜而成功嘅藝人好多,你阿媽都係因為肥所以喺麗花皇宮彈出做咗七公主而紅,點解佢肥會個個都鍾意佢,你肥咁多人唔鍾意你?因為你阿媽攞肥做Advantage、小儀攞矮做Advantage,而你張肥包裝成你嘅Disadvantage然後不停不停又不停地消費搏同情然後話自己好堅強唔介意又乜又盛但係講足五年依然提住、 記返十九幾年前嗰啲冇人記得嘅死亡之吻。冇錯,你講得好啱,你的確唔夠你阿媽做人叻,呢個係人嘅質素同心態問題唔係身型問題。曾志偉外表討好嗎?再近啲,細細粒肥過你,但係啲人鍾意佢。點解人得你唔得?可以反省吓。有人肥同外表唔靚係討喜,而你係討厭。如果你真係敬業同專業,當你做到曾志偉咁可以做精裝追女仔嘅醜角而得人鍾意、又可以做到韓森呢個同自己形象完全相反但又做得好好嘅角色,當你可以唱到Adele咁冇人再提佢個身形,你先叫成功。以你而家嘅Mindset,仲差好遠、好遠。

最後一點,你想知喺演藝界邊啲人係為咗份表演出色而喺身型上努力?Christian Bale同Woodley Shailene。Christian Bale拍Batman全身肌肉二百磅,拍The Fighter減到130磅得排骨,拍American Hustle增肥有肚腩去返180磅,係三五年間嘅事。Woodley Shailene平時自己肥,但拍親戲佢都好Fit。甚至連Jennifer Lawrence呢個講過誓死唔減肥嘅人為咗拍Apocalypse做Mistique都瘦咗成個碼,為嘅唔係靚而係角色需要。 呢啲喺演藝事業叫專業、叫敬業。而唔係死都唔減然後話人歧視你,要個角色去就你唔係你就個角色,包括舞台上呢個叫歌手嘅角色。

老老實實,我之前八年我真係冇討厭過你,我真心真意地覺得你唱愛回家好好聽,好舒服、好自然、唔做作。直到今年,你又攞返出來講,講自己有幾痛苦,講自己掙扎得幾辛苦,講自己有幾受害,係你親手抺殺咗自己喺歌藝上得到嘅認同。如果你好似Adele咁專心唱一啲同身型冇關嘅歌、不停地唱愛回家呢啲咁高質素嘅歌,而唔係去唱Taylor Swift嗰啲咩Shake it off同Twenty Two,我諗你嘅成就不只於此。

古語有云:人被侮必先自侮之,完完全全Apply落你身上。唔該,真係慳返,腳踏實地做實事,拜託。我唔想每次見到你上新聞都係吐苦水搏同情,因為真係好煩、好討厭。

就係咁。希望唔好再見。

 

(標題為編所擬)

發表意見