立場新聞 Stand News

酒店賣書?通宵借書機?香港幾時咁多人睇書?

2017/2/21 — 11:11

真搞笑!香港人唔係唔睇書嘅咩?因乜解究,最近連酒店都話要賣書?

呢一兩個禮拜,香港都幾多書嘅新聞,唔係有咩書被禁,而係好鼓勵你睇書咁款。首先係政府,香港人唔入圖書館借書,所以要喺香港九龍新界整返三部 24 小時「自助圖書館服務機」。我心諗—邊度有人想三更半夜去借書先?圖書館都已經開得咁密,總有一間係左近。要借,根本唔係難,認真所謂「非不能,不為也」。不為,當然有好多原因啦,好明顯就係香港人本身就唔好書。

(圖片來源:區議會文件)

(圖片來源:區議會文件)

廣告

上年,香港出版學會做咗個「香港全民閱讀調查報告」,超過三成受訪者話佢哋成年都無睇過實體書喇!根本就係無需求,搞咁多「自助借書機」都無用,大家本身就無興趣!

廣告

但又好奇怪喎,最近有間獨立書店 MCCM 同 Hotel Stage 合作,喺佐敦搞間酒店書店,又係主打做得夜,開到半夜 12 點。其實,香港人做嘢咁攰,收工仲有幾多人睇書?開得夜都無用,打工仔煲吓劇,開開心心又一晚唔好,睇書又要用精神。係咪先?

STAGE 書店
(圖片來源:MCCM Creations facebook)

STAGE 書店
(圖片來源:MCCM Creations facebook)

我就咁睇。酒店書店嘅嘢,其實同誠品開完一間又一間,係同一個道理嘅。書店,一早已經唔係賣書,而係書店係文化係型。酒店有書店,呢間酒店好型。搞埋文化活動,吸引埋啲街客,順便幫襯埋酒店啲高級咖啡店。錢,全部都係錢。連酒店出嚟做訪問嘅代表,都係咩「品牌策略師」。明哂,書=文化=打造品牌。

戴返個頭盔先,我唔覺得書唔重要,只係要推書都要有辦法,係「真推書」。書店閂得早,一定唔係大家唔睇書嘅原因。坊間唔少書店,尤其二樓嗰啲閂成九點十點。要睇書,唔差嗰一兩個鐘。酒店呢啲咁離地嘅地方,想搵個 traveller 唔係 tourist 都難。追求文化旅遊嗰啲,應該都 book 咗 B&B,或者 hostel 啦!要香港人入酒店,同叫佢哋入 gallery 一樣,心裡面有道跨越唔到嘅門檻。

真推書,圖書館有責任嘅,但佢要做嘅嘢,應該要吸引香港人睇返書。書有咩咁重要,點解我哋要睇?實體書點解好過電子書,應該要回答呢啲問題。24 小時「自助借書機」係型,但無用;同酒店書店一樣,做完覺得自己 feel so good,做實事,不如入社區做讀書會啦!

發表意見