立場新聞 Stand News

俾多一蚊就可以投到啟德地

2017/3/19 — 11:19

資料圖片:啟德發展區(youtube片段截圖)

資料圖片:啟德發展區(youtube片段截圖)

早幾日新一幅啟德地皮揭標,結果又係海航集團投得,吊詭係成交呎價13500,若大家心水清,海航系之前三次投得啟德地,每呎出價分別係13500、13600及13000,簡單講,佢個價大概圍繞喺13500水平。

咁即係點?即係話海航明刀明槍講俾市場知,佢一係唔投,一投就係呢個價,所以其他發展商要估佢個價絕冇難度,只要出價大概高於13500,你搶到塊地嘅機會係超過95%,事關海航已經將呢個價變成啟德標準價。

啟德標準呎價13500

廣告

但點解咁多發展商投標,冇一個願意多俾一蚊呢?好明顯係海航個價實在太不合理,經過幾次競投都唔可以創出個更高價。香港發展商已經好明顯唔同佢癲,索性等佢哋搶完至算;個別大陸發展商想搶地,雖則都加咗唔少價,但畢竟真金白銀,左計右計都計唔掂,最終都出唔到海航標準價。

海航現時愈賭愈大,累積掟咗兩百七十幾億落啟德區,但故事未完,啟德仲有好多塊地要推,佢為咗要維持呢個價,好大機會要不斷以13500去競投,否則出咗個萬三以下呎價成交,海航就面對好大壓力,因為佢嘅土地估值會立時被拖低。呢個唔係講笑,兩百幾億估少一成,即唔見廿幾億,海航目前係騎虎難下,豪賭一舖定生死。

廣告

啟德會否成為海航覆沒之地

海航𠲖家等緊有冇另一個癲價出嚟,只要有一個大陸佬肯俾多過13500,咁海航就成功,若然有人俾每呎萬四,海航之前嘅出價先可以話被市場認同,而佢持有嘅地皮估值就可以更高,否則13500呎個價並冇意義。

海航集團喺內地得以急速發展,好大程度利用資本市場操作,先後收購多家上市公司,利用個上市平台集資然後再投資,由於大陸過去十年經濟不斷增長,海航豪賭都可以過骨。佢將呢個操作模式應用喺香港,過去一年頻頻喺股票市場買殻,相信就係利用呢啲公司作為融資平台,未來或許會將投得土地股份,分別注入各家本港上市公司,以減低資金壓力。

問題係呢幾年香港經濟會點?本地樓價能否迭創佳續?美國息口走勢會點?未來4-5年本地房屋供應等等未知變數,若有乜風吹草動樓價唔好話向下走,即使唔升海航都好危險,一個搞不好,啟德唔知會唔會成為海航覆沒之地。

發表意見