立場新聞 Stand News

假如李嘉誠真的退休

2017/6/25 — 10:02

資料圖片:李嘉誠

資料圖片:李嘉誠

早幾日老外傳媒話李嘉誠要退休,弄得香港媒體天未光就老遠跑到深水灣李家大宅等候,超人回應模棱兩可,只係話身體好好,退休一定會公布。有證券行主管急急跑出來扮專家,話長和系一切已上軌道,李嘉誠退休對公司股價冇影響。

係咪冇影響?梗係百分之一百唔係喇,縱然你幾唔鍾意李嘉誠,話佢地產霸權,官商勾結都好,不得不承認,佢喺香港商界,甚至世界企業家中,眼光及能力都超乎常人,應該係超越無數成功企業家。

從50年代黐膠花賺得第一桶金,到把握67年暴動大手投資地產,於70年代收購和記洋行,80年代併吞港燈,令集團成為商業王國,到科網年代出售電訊公司橙而賺取千億利潤等,不光是華人首富,更走出香港,企業遍布世界,華人富豪有幾多能做到?

廣告

換咗個腦等唔得

整個長和系靠乜?好明顯就係李嘉誠,即使你話佢有好嘅團隊輔助,但呢啲人都係李超人搵返嚟,都要有個明主懂任用才可發揮所長。你又可以話過去幾十年適藉香港起飛,時勢做英雄啫;但我想講,你都要能夠把握到時勢,先可以順流而上,又唔見其他生於3、4十年代嘅人做到。

廣告

還有,要明白長和係香港人企業,並唔係國企,沒有必然壟斷市場嘅先天優勢,國企即使個CEO被雙規都冇所謂,事關阿爺喺背後支持;長和亦唔係西方企業咁,有良好制度運作,你看蘋果,Steve Jobs死咗,Tim Cook上台一啲都冇問題。

本地華人家族企業係人治,公司好似一個人,李嘉誠就等如公司大腦,你話換咗個腦得唔得?

冇李嘉誠長和股價要打折

雖則你話李嘉誠個大仔李澤鉅都喺公司咁耐,亦冇乜出過大亂子,加上公司上晒軌道,冇咗個人啫,有乜問題。

近十年八年,跟長江做過生意啲人都會呻,話太子好手緊,又將數期拖到好長,跟佢做生意好難做。可以咁講,以李澤鉅性格,只係一個守業者(當然守業都唔容易),暫時睇唔到佢會敗咗副身家,但你話佢有冇老竇嘅能力、眼光同用人唯才嘅心胸,我好懷疑?況且你唔擔保老竇兩腳一伸,佢會唔會變咗隋煬帝楊廣。

簡單講,若李嘉誠退休,長和系嘅股票就要折讓1成,若然佢死咗,咁就要打個7折喇!

 

發表意見