立場新聞 Stand News

創業的節奏

2017/7/18 — 14:43

有玩過打拳的人,必定打過 speed ball,即是那個類似回彈球的東西。任何拳擊教練都會告訴你,打 speed ball 不是打力的,而是要打距離;太大力,你反而會被你打出去的 speed ball 打中。創業去到某個階段,其實就是在打 speed ball。

唔明?唔明係正常,絕對唔係話創業嘅人好聰明,所以講啲嘢其他人唔明;而係創業嘅人好奇怪,奇怪到冇人會明。蝕錢嗰陣冇人明,喂,蝕錢仲搞落去,真係唔明你;賺錢嗰陣更加冇人明,喂,賺緊喎,點解個樣仲咁愁,好唔明喎。

蝕錢仲要搞落去,原因好簡單,唔服輸,亦都唔怕輸;至於賺錢個樣好愁,原因都唔複雜,因為賺錢只係代表你做啱一件事,但賺嘅錢唔算多,代表你仲要做多好多樣啱嘅事,而呢啲啱嘅事,要等你自己發掘點做,隨時諗爆你,愁是正常的。

廣告

開始創業的時候,你為了一件產品而成立一家公司;然後到了某個階段,你便會為了這家公司而懊惱怎樣搞好產品;再到某個階段,你再也搞不清到底是產品重要還是公司重要,因為其實兩者同樣重要,而去到這個時候,便是你要擔心商譽的時候。

生意做得有幾大,就係睇你商譽,講得俗啲,即係你個朵。好多人嘅生意做到咁上下冇突破,就係因為個朵出咗問題;呢個朵可以係老闆嘅個人形象,亦都可以係公司文化。

廣告

有啲老闆當公司係提款機,即係公司賺錢其實就係為自己,咁樣嘅老闆一定好失敗,因為佢會好孤寒,佢會唔捨得洗錢,佢覺得員工唔應該有花紅,因為佢覺得自己先係承受最大風險嗰個,所以同事根本冇資格要咁多錢。想像吓,一個咁嘅老闆,同事會似乜?留得喺度嘅同事,一係騎牛搵馬,一係冇能力搵過一份更好嘅工,即係留得喺度嘅人,根本只係一件機器嘅齒輪,唔係話唔重要,而係喺勞工處是但執件都得。

做生意係講錢,但講嘅錢唔係一個算盤計到嘅加減數。有樣嘢,算盤都計唔到個價值,呢樣嘢叫做尊重。只要你肯尊重自己,尊重人哋,今日你蝕底嘅,聽日一定會賺得返嚟。無端端咁大感觸,係因為一部平治 CLA。

約一個月前,我喺一個 facebook group 出咗個 post,我話想以某個價錢賣走部 CLA。可能我出嘅價錢太抵,好快就有一個日本人話要買。既然有人咁爽快,我當然就好快應承賣畀佢。隔咗兩日,有另一個買家好想要,話出多五萬;有見及此,我將個情況講咗畀日本人聽,然後問佢係咪真係買。

日本人第二天便立刻約我出來交易,並多謝我在沒有合約之下,履行了我的口頭承諾。

一星期前,有電視台高層邀請我主持電視節目。會面後才發現,原來他們就是那位日本買家的朋友。

懂得打 speed ball,便會知道不是要打力,而是要打距離;懂得做生意,便會知道不是要那單生意的金額,而是要那單生意的潛在回報。

作為一個拳手,只要能夠打出自己的節奏,便能控制拳賽。買賣的節奏,不一定是你賺我蝕,因為還有一種節奏叫做「先敬羅衣後敬人」;只要你打出這節奏,對手便會跟著你的節奏走,得到最後勝利的總會是你。

發表意見