立場新聞 Stand News

所有預測都係垃圾

2017/2/19 — 9:26

資料圖片

資料圖片

很喜歡這個標題,忘了在那裡讀到,那就拾人牙慧,用在自己文章。

忽然用這個標題,全因近期港股做好,有玄學家仆出嚟預計恒指將見4萬點。一見呢啲預言,Loser馬上有戒心,事關過往每每有人作出跨張預測,個市唔係回就係插,今次會點唔敢講,但點解佢哋咁估,道理好簡單,你唔誇又邊有人注意。

就如當年啲人睇港交所(0388)見500蚊、神華(1088)100蚊咁,又如2015年5、6月時,啲人話港股見32000,事後點呢,梗係全錯喇。

廣告

誇張預測冇投資價值

近期啲講,今年新年時有大大小小預測,大部份估計港股上半年會差,下半年會好,其中最搶眼是說人仔今年會跌幾多幾多,將見七算,點知剛過年不到幾天,人仔同業拆息忽然抽高,結果嚟一招大反擊,離岸人仔一度急升過千點子,實在十分好笑。

廣告

從呢啲事又讓我諗起,多年前有朋友寫生肖書,我問佢識咩?佢答:「使乜識,個個都係咁,將舊年啲書抄抄襲襲咪得囉,其實買嗰個都知唔準,只不過用嚟玩玩啫,何必認真。」

何必認真,確是一種做人態度,用呢種心態去睇股市預測,你就會釋懷,覺得係一啲荼餘飯後嘅話題,大家說說笑笑就可以。

何必認真

不是嗎,我見許多所謂預測其實幾有趣,年年都啱用,例如「今年恒指十分波動」,坦白講,恒指每年都上上落落,那一年不波動?又例如話「國際市場充滿變數」,大家諗諗,國際政局瞬息百變,舊年就話美國選舉,今年就話特朗普上場,那一年不是變化萬千?最有趣係有預測話「中國將有一家大企業出事」,坦白講,中國那麼大,每年流流長,總有一兩家出事,況且點定義出事,任你演譯。

不過,有啲人就比較厚顏,話自己喺2016年嘅預測中咗九成,Loser於是走去睇睇,劈頭話佢預計舊年恒指介乎18500至23500點,結果中晒,我好奇怪,舊年恒指係18278至24364點,又點會叫中?

都係嗰句,預測呢家嘢,極其量當係一個意見參考吓,不用太認真,就好似Loser俾嘅建議都係,輸咗都唔好賴我呀。

發表意見