立場新聞 Stand News

投資技術文:千規律,萬規律,投資規律僅一條

2017/8/9 — 11:37

作者提供圖片 l 圖片來源:https://app.kxg.io/

作者提供圖片 l 圖片來源:https://app.kxg.io/

***警告***
***警告***

本文僅用作分享自己嘅投資方法,並非用作投資或不投資推介。本人不會透過此文章得到任何人士/公司任何形式嘅金錢或非金錢回報。

投資涉及風險,個人作出投資決定前,請作出適當風險評估,並請教專家或咨詢專業意見。

廣告

***警告***
***警告***

香港地生活艱難,好多人想靠股票發達。以前識新朋友,一畀人問大學讀乜-我答「讀經濟學」,跟住個問題就係-「買邊隻股票好?」。類似情況屢見不鮮,早已習慣。

廣告

自己寫作多年,一直避寫股票投資。一嚟無題材(藉口)、二嚟無時間(都係藉口)、三嚟怕誤人子弟(當然都係借藉,寫文咁多錯字就唔誤人子弟咩),直到今日先寫第一篇……亦應該係最後一篇。對我嚟講,寫股票就好似表演切柒咁,第一次表演就係最後一次,哀哉、哀哉。

大學開始買賣股票,至今十七八年。受過無數教訓,領過好多鑊甘嘅,近年領略到,有用嘅招數一招就夠。正如張大教授五常曰:「千規律,萬規律,經濟規律僅一條。」

我基於三個因素,發現咗一個簡單無比、又令自己非常滿意嘅投資方法。而家寫幾千字心得,畀啲初出茅廬嘅畢業生(唔係中出茅廬)、又或者想投資股票但毫無認識嘅人。

如果你滿足以下全部三個條件,可以考慮跟呢篇文介紹嘅方法去投資。記住,係要三個條件都滿足晒先好跟住做;滿足唔晒就算鳩數,寧願做定期輸畀通脹,心安理得,唔使擔驚受怕輸突輸本金。

────

***第一,我有舊空閒錢可以拎去長線投資***

我每個月有舊固定數目嘅錢可以拎去投資,以前出嚟做嘢就三兩千蚊;而家大概六七千。

更重要係,啲錢我可以放心用嚟做長線投資-放上十年八載嘅,先叫長線。我完全唔使上個月買完,下個月就因為要課金或者找咭數而要變賣股票。

至於我每個月搵萬幾蚊點樣先儲到錢呀、理財呀、點儲首期呀嗰啲,對唔治,超出咗會考範圍,唔喺呢篇文解答。

***第二,我懶、我無知、我無時間***

呢個條件嘅重點:我唔想主動去打理股票。

唔想主動去理,原因包羅萬有、森羅萬丈、百花齊放:唔識乜嘢係股票、唔想花心機同精神研究股市睇年報留意經濟循環息口走勢資金流向財演蘋果B疊,更加唔想花時間,甚至乎連股市係乜都唔知。

乜嘢原因都好,總之,我唔想主動去打理股票,只想一勞永逸,係咁咦做啲嘢之後,錢就自動自覺去咗投資股票。

[相反,如果你自認為係聰明子,點石成金,又或者願意花時間精神研究個別股票,呢篇文推介嘅嘢唔啱你。]

***第三,我希望投資贏錢、贏得嚟又要穩陣***

投資,就梗係要有正數回報,即係贏到錢。

我嘅計劃唔使令我大富大貴,我甘於接受有合理而穩陣嘅回報-定義為平均回報有5-7%(包括股價及派息),確保回報長遠能跑贏通脹。留意,通脹係唔包括樓價嘅;而過去六七年,唯一能夠跑贏香港樓價升幅嘅……就只有樓價itself……你話幾pathetic……

無錯,呢個計劃係專門畀嗰啲又想馬兒好、又想馬兒不吃草,想贏錢又唔想付出嘅香港人。

───

至於我嘅投資計劃,就係:

「月供
盈富基金(號碼2800)」

OK,我聽到螢幕後面好多人問候我老母。好多人以為我玩嘢,但係我係認真嘅。講多次:

「月供
盈富基金」

呢個計劃有兩個要點:

「月供」

「盈富基金」

如果你睇到呢度,講咗句「呢條友都戇撚鳩,寫幾千字話自己月供買盈富基金,我去買騰訊唔好?」我奉勸你珍惜生命同時間,無謂再睇落去。

──────────────────
不要問,只要like,仆街史兄的專頁同IG。
Facebook : https://www.facebook.com/Relgitsjg
IG (主要用嚟睇女仔) : https://www.instagram.com/iamuncleshit/
Project HK 專頁:https://www.facebook.com/PROJ.HK/
──────────────────

簡單介紹返「月供盈富基金」

1. 乜嘢係「盈富基金」?

-買盈富基金等買恒生指數,而恒生指數包括50隻成份股。你買盈富基金,等於買晒恒指成份股。

-50隻成份股喺香港嘅股市中有代表性,其股份一般具有高市值和流通性。成份股包括本地老牌公司如匯豐、中電、恒生銀行;內地公司如中石油、中移動、中人壽等。

-盈富基金喺港交所掛牌,好似股票咁,只要開市就有得買賣,你開個e-banking click 幾下就可以買賣,唔使等、唔使好似mutual fund咁要等贖回。

2. 乜嘢係「月供股票」?

-每月以固定的金額,喺指定的日子買入想投資的股票。

-每月投資嘅金額一樣,股價低嗰陣咪可以買多啲、高嗰陣就買少啲(例如$1,000,每股20就買到50股;每股100就買到10股)

「月供盈富基金」有乜好處

1. 唔使煩(月供計劃優點)

好多香港人對於金融市場及基金金融運作,毫無概念,又唔想學、唔想煩。

月供股票計劃,你只要開頭做一次預設指示,銀行/經紀行每個月會幫你自動扣錢、買股票、再入去你戶口。

撇除你要加大額度或者停止投資,月供真係可以搞一次之後永遠唔使再理-直到你要賣股票。一勞永逸,啱晒香港人。

2. 每月硬性規定你要儲舊錢(月供計劃優點)

3. 門檻低、管理費低(盈富基金優點)

盈富基金每年嘅管理費加開支大概0.15%,真係平到你唔信(一般基金1-3%)

4. 回報合理(盈富基金優點)

盈富基金喺1999年11月上市,如果你由1999年12月開始每月買入$1,000,到咗2017年6月底(唔計7月嘅瘋狂)

-你共買咗211個月,總投資成本$21.1萬;喺2017年6月底,股價市值係$32.4萬,中間你收股息約8萬,總回報係$40.4萬;

-總回報平均每年約6.9%,非常貼近5-7%要求回報嘅上限。你每投資$100,000,大概10年就會double。同期每年通脹大概係1.6%;

-每年6.9%回報,扣除投資成本同花時間搞一次麻煩嘢(開戶口、投資計劃等),真真正正坐喺度有錢收,不勞而獲。完全唔需要任何功夫、努力、勞力,定時定候畀銀行扣數就得,乜嘢係P/E ratio MACD RSI陰陽燭牛一牛二牛三全部唔使理……

────

些少解釋:

盈富基金 加 月供,係將分散投資(Diversification)發揮到盡頭嘅招數:首先將錢分散喺唔同大公司嘅股票上面,繼而將錢分散喺唔同時段投資,diversification within diversification。

好穩陣,你亦唔需要打理-唔需要打理一嚟係因為月供你根本無嘢好做;二嚟係因為佢穩陣,係一隻會自動生蛋(唔係生金蛋)嘅雞,唔需要你去理佢。

咁穩陣嘅投資方法,當然有代價:

-你永遠學唔識投資……即係你嘢嘢守株待兔,唔識主動去捉兔仔。雖然盈富包括香港市值最高嘅五十大公司,但有啲估值便宜而且增長潛力強勁嘅股票,你唔識發掘出嚟;

-升市時表現可能會較大市差。因為你手頭上嘅盈富係過往股價嘅平均值,當升市時升幅多數比恒指低。呢個情況通常會喺你開始月供計劃開頭一段時間,個市又升緊嘅時候出現。總之,由你入市嘅成本係由開始月供計劃到今日嘅平均數,你嘅升幅多數會比大市由低到高嘅升幅低。如果長期投資,經歷股市升跌,你入市嘅成本反而會較低、回報反而較大市高。記住,跌市千祈唔好cut plan!!

───

由於預計到有大量人士會抱有不同意見/疑問,喺度預備咗幾條問答:

問:你有冇跟住上面嘅嘢做?
答:有。我由2005年開始,已經月供盈富基金。以前月供兩千,加過幾次金額。十幾年,盈富佔咗我股票投資大概30%。手頭上盈富基金嘅成本,扣除股息後大概係每股$17-$18,現價係$27。

問:我想學投資,而唔係跟你咁做,應該點?
答:去買本書學。至於睇乜書,我無推介,但作為基本心法,Benjamin Graham (畢菲特師傅)嘅The intelligent investor 不可不讀。不過,一般人睇到本書成本聖經咁厚就會放棄。

問:點睇其他ETF,如2823(A50)、2828(H-share ETF)?
答:兩者我都有買,但沒有月供。簡單講:A50係買喺大陸上市嘅龍頭、H share ETF係買喺香港上市嘅內地大藍籌、盈富係買喺香港上市嘅大藍籌(不論國家)。

如果只能買三者其中之一,盈富基金嘅公司比較穩陣。我會選擇盈富。

問:學你咁投資盈富基金,係咪賺梗?
答:絕對唔會。任何投資都有風險-風險就係有可能拎唔返投資嘅金額。

如果有人同你講買股票賺梗,一係昆鳩你,一係講緊銀行存款。

事實上,如果你喺2004年3月開始月供,去到2009年2月(港股喺金融海嘯嘅底),60個月每月供買$1000,總投資6萬(共3560股,每股成本16.85);但2009年2月底嗰陣,你手上嘅盈富加股息只係得$5.3萬,要蝕嘅。同時間要留意,3個月後嘅2009年5月,盈富基金已經去返$18.44,你已經好快返到家鄉。

我無辦法保證投資唔蝕;不過,自1999年盈富上市以嚟,無論邊一日入市都好、hold到今天都冇人成功蝕到錢(計埋股息;中途賣咗唔算)。我只能講根據往績,你買咗盈富放喺度,長遠蝕嘅機會好低。

問:點解唔推介XXX(其他股票號碼)/其他投資方法(如技術分析、價值投資)?
答:投資嘅工具同方法,因時制宜,因人而異。我自己用嘅,係一種《懶人投資大法》。你唔懶、唔怕承擔較大風險,絕對適合用其他方法投資。

你當投資嘅工具同方法,等同去健身室做gym:有人中意跑步、有人中意舉啞鈴-就算舉嘢都有人淨係做背脊、有人做胸、有人去gym跳舞做yoga,最緊要係畀啲掙扎(cf 羅力威師傅)。

無話邊個啱、邊個錯,冇一個投資風格或者產品會適合世上所有人。個人體質適合跑步,咪去跑步,你唔會話佢唔舉嘢係錯掛?

問:點解唔買騰訊?隻嘢由幾蚊升到幾百蚊?
答:一定會有人問騰訊,所以特登整一條問答專講騰訊。

你要知道係騰訊成為騰訊之前,無人知騰訊原來可以好似騰訊咁升得咁騰訊(你咁愛騰訊,成段五句出現咗八次騰訊,夠滿足你騰訊嘅慾望未?)。

香港有千鳩幾間上市公司,你揀得幾多間、又可以投資得幾多間?我懶、我無知、我無時間,揀盈富基金算。你勤力、你聰明、你有做功課,大可以搵到下隻騰訊。順便祝你好運。

喺騰訊出現之前,2000年有隻嘢叫電訊盈科,嗰陣寫股票唔寫電盈,會畀人屌;2007年有隻嘢叫港交所,一樣。

I mean,一樣咁多人中伏。

Btw,如果你將第一段嘅「騰訊」變咗「聯旺集團」,由「升」改做「跌」,一樣work嘅。

揀估我就唔識。你可以去學再應用,一樣有人成功的。

問:點解唔買有專業投資人才幫我管理嘅互惠基金(mutual fund),而要買盈富基金?
答:首先,盈富基金笨唔係基金嚟,唔好畀佢個名呃咗……佢本質好似基金,但又唔係基金,唔可以同mutual fund比較。

我可以畀10個原因你去買mutual fund、亦都可以畀10個原因你唔買。銀行經理會畀100個原因你去買mutual fund,但唔會同你講佢想你買嘅真正原因-佢要跑數同賺佣;財演會同你傻仔先買盈富,但唔會同你講買細價股更傻。

投資嘅工具同方法,因時制宜,因人而異。點揀唔喺會考範圍,唔詳細講。

基金包羅萬有,目不暇給,揀啱一隻會升得勁嘅基金,難度同揀啱一隻會升得勁嘅股票一樣咁高。我懶、我無知、我無時間,揀盈富基金算。

重申:我唔會話自己一定啱,冇一個投資風格或者產品會適合世上所有人。不過,我唔會買基金。

問:怕唔怕高位入市?
答:一定怕。唔怕高位入市嘅人,唔會有好回報;正如唔怕死嘅人,無咗生存嘅慾望,人生係唔會有進步。

投資,一定要怕高位入市。

不過,無人估得中乜嘢係高位、乜嘢係低位。

我怕,但花咗時間去研究都唔會有效果,思考有時間成本但無任何實質效益,所以索性放棄思考。但我心底仍然好怕嘅。

投資股票,一定要抱住一個謙虛嘅態度-你永遠贏唔晒嘅錢(但可以輸撚晒)、永遠有股票升幅高過你持有嗰啲、永遠唔能夠係最低位買貨/最高位出貨。只要你一日仲喺股市,你永遠叻唔晒。

比返少少資料,萬一喺上次恒指高位(32 000點,大概2007年10月)入市,究竟要坐幾耐艇?

-如果喺2007年10月底用$117,000買一炮過盈富(07年10月到17年6月共117個月),當時每股$31.4,到今日仍未返到家鄉;扣除股息成本為每股25.15,要到今年5月,相隔10年先返到家鄉。每年平均回報係接近0%。

-如果喺2007年10月底開始買一次盈富,每個月供$1,000,keep住買,喺2009年6月、相隔18個月已經返家鄉。每年平均4%,未計股息。

呢個月供平均法喺跌市然後回升嘅情況下,蝕本嘅時間比較短-但代價係大升市嘅時候回報率會較低;盈富基金本質就係變動/風險無咁大(相比個別股票)。如果你好擔心蝕本,一用月供平均法、再加盈富基金,兩個穩陣嘅方法一齊用,超級穩陣。

問:我完全明白了,跟住點?
答:上網睇下點設立投資戶口同月供股票,問佢拎收費同細節睇。記住記住揀啲低手續費嘅-例如獅子幫你去買嗰陣係唔收手續費(你賣股票嗰陣先收)。報紙雜誌周不時就做相關報導,去google下無死。

***記住!開設計劃之前要留意銀行收嘅手續費、存倉費、代收股息費等等,呢啲收費會蠶食你嘅回報-如果你月供$1000佢收你$50做手續費,你實際可以買股票嘅錢得$950,第一年有6%回報嘅話舊錢先去返$1007,即係第一年嘅回報會畀手續費食咗。***

────

《外傳:瑞安建業》

喺我持有嘅股票中,有隻瑞安建業(983)。2014年,公司派咗大舊花紅,咁啱有朋友同我講咗啲所謂「內幕消息」,建議我買瑞安。我當時想派一次花紅變派兩次,於是我將成舊花紅買晒瑞安建業。

瑞安建業現價大概$2.3……

而我買入嘅價錢大概係$8,即係輸咗70%。

我決心保留瑞安建業。每次見到瑞安建業跌到殘嘅股價,我都會警醒自己,靠「內幕消息」贏錢係好運、輸錢係梗局。

──────────────────
不要問,只要like,仆街史兄的專頁同IG。
Facebook : https://www.facebook.com/Relgitsjg
IG (主要用嚟睇女仔) : https://www.instagram.com/iamuncleshit/
Project HK 專頁:https://www.facebook.com/PROJ.HK/
──────────────────

[本文僅用作分享投資想法,並非用作或意圖作為投資或不投資推介。投資涉及風險,個人作出投資決定前,請作出適當風險評估,並請教專家或咨詢專業意見。]

註:標題靈感來自張五常1979年文章《千規律,萬規律,經濟規律僅一條》。

盈富基金資料:
http://www.trahk.com.hk/chi/download/TraHK_Factsheet_Jun_17-Chinese.pdf

蝙蝠俠圖源:
https://app.kxg.io/
 

 

發表意見