立場新聞 Stand News

自住買樓冇問題?梗係唔係喇!

2017/3/26 — 9:47

李嘉誠,圖片來源:無綫電視片段截圖

李嘉誠,圖片來源:無綫電視片段截圖

長實業績會,李嘉誠被問到買樓問題,超人話若你係自住,幾時買樓都冇問題。

事實係唔係?梗係唔係喇!若然喺樓價處於高位入市,買咗後隨時有機會回調,換言之係買貴貨,又點會話冇問題。

買貴就等同買錯,千萬別自欺欺人,你每個月係真金白銀拎錢供樓,貴買等於每月供多咗;即使你一筆過付款,若然樓價跌3成,之前1千萬買嚟層樓,今日700萬可以買到,咁你話係咪冇問題。

廣告

長期來說 我們都死了

雖則好似超人話齋,香港樓價長遠係升,計埋通漲,永冇蝕底。但細心諗諗,你會發覺背後有個假設,係香港樓價永遠上升,市場永遠處於通漲水平。其實長遠嘅嘢冇人知,日本樓衰足30年,到今日東京樓仲平過東莞樓,所以講到長線,都係引用經濟學泰山北斗凱恩斯名句:”In the long run, we are all dead”

廣告

即使長線係升,若出現一次類似97情況,樓市衰足6、7年,樓價陰乾7成,你若揸住層樓,捱唔捱得過呢段黑暗期都難講。喺經濟唔好時,樓價插,租金跌,人工減,甚至裁員,閣下有冇足夠經濟能力去渡過難關?

買貴等同買錯

又或者咁講,你心理質素有冇咁好,可以持貨渡過困境。坦白講,𠲖家睇返轉頭,你會話當年賣樓人士好蠢,但親身經歷就唔係咁講,身處跌浪之中,你夠膽話樓市唔會再跌咩?

唔好聽啲發展商講,話樓係買嚟住唔係買嚟炒。無論你點唔同意都好,樓唔係一件傢私、亦唔係一件衣服,呢啲物件買入後就一直折舊,少有投資價值;相反樓除咗有居住功能,佢嘅價格可因市場變化而起起跌跌,係具有投資價值的商品,本質上跟一般物品不能同日而語。因為存在投資價值,即使係自住,都要懂得入市時機,不能好似某啲人話「有買貴冇買錯」。

當然,你話今年樓價會跌我唔多相信,但兩、三年後就難講,畢竟樓價處於極高點,上升空間係有;但若回跌,幅度可以好驚人,計算過值博率後,今時今日都係穩陣啲好,唔買至多賺少咗,但買入後下跌,綁你十年八年,嗰種慘況只要經歷過97嘅人,又或者日本仔就最清楚。

 

發表意見