立場新聞 Stand News

出席官立方「性別承認咨詢會」後 — 論中立

2017/9/8 — 17:55

象徵 LGBTQ 群體的彩虹旗 l m sew @ flickr — Attribution-NonCommercial 2.0 Generic (CC BY-NC 2.0)

象徵 LGBTQ 群體的彩虹旗 l m sew @ flickr — Attribution-NonCommercial 2.0 Generic (CC BY-NC 2.0)

【文:Henry Tse】

其實只要唔係傻嘅,都會一眼睇得出政府份咨詢文件向恐跨宗教人士傾斜。文件除左絲毫無提過文件出版前, 兩宗分別係歐洲人權法院(*備註)同聯合國人權委員會(**備註)嘅跨性別人士勝訴重要案件之外, 竟然包含多個毫無科學及專業根據嘅宗教反對觀點。 如果讀者唔睇清楚個出版國家,真係會以為呢本 「咨詢」文件係嗰啲當女人賤過草嘅落後宗教國家出版。但最令人咋舌嘅係, 咨詢小組成員, 港大法學院首席講師張達明(法律學者)​認為,喺是次有關公共政策, 獨沽一味地考慮基督教一派嘅反科學觀點,係合理並中立。

先不論香港作為世俗化嘅國際大都會,政教分離理所必然。就算當香港真係宗教大過天,咨詢文件實情係完全無列出過伊斯蘭教,錫克教,印度教,或者飛天麵條神教​等等其他宗教嘅觀點。因此,無論從世俗或者宗教嘅角度去睇,呢份咨詢文件都一定係向恐跨法西斯基督教惡勢力叩緊頭。堂堂一個有權有勢嘅港大教授,竟然公開地指鹿為馬,面不改容,毫無廉恥地謊稱自己為中立,帶頭賤視人權,帶頭壓迫飽受歧視嘅跨性別極小眾,實在令人作嘔。

廣告

W案由終審判決到而家,經已4年幾。4年幾以來政府一直漠視終院判詞及跨性別弱勢群體的迫切需求, 拒絕為性別承認立法。即使香港政府今日聽番終審法院2013年那一席苦口婆心的話,立即將英國性別承認法2004全套搬來香港,比起其他文明國家,都已經係too little, too late。W案終院判詞從來無提咨詢, 政府搞咨詢本為繼續拖延立法的煙幕, 令跨性別平權遙遙無期,張達明你重點可以辯稱咨詢文件係中立?

故意漠視終審法院及跨性別人士基本權利,拖延性別承認立法,搞個扮咨詢嘅show出黎,再出份275頁嘅文件, 唔係中立。保持中立, 唔係有5項專業支持理據,你就去整番5個宗教反科學嘅點出黎篤數。中立,係立即設立一個符合文明國家標準(無手術要求)嘅全面性別承認法制, 還番丁點兒的生存空間俾受盡社會歧視嘅跨性別人士。但恐怕這個簡單嘅道理, 主持星期一咨詢會嘅達官貴人張教授都不明白, 因為講到底, 張只係一個助紂為虐, 欺善怕惡嘅奴才而已。

廣告

 

*歐洲人權法院案

**聯合國人權委員會案 

original facebook post

作者自我簡介:本人為女跨男跨性別者。2017年5月, 本人向法庭申請司法覆核, 挑戰現時拒絕女跨男人士更改身份証明文件權利之有關條例。案件將於2018年1月於高院受審。因為被社會無理地污名化而受盡歧視, 現在只好走出來為自己爭取自己本應享有的基本權利。於香港盡快設立不需手術的全面性別承認法制為本人的抗爭目標。

發表意見