立場新聞 Stand News

你對格力犬有幾認識?

2018/6/27 — 21:12

格力犬(圖片來源:維基百科)

格力犬(圖片來源:維基百科)

【文:小明(國際認證寵物犬訓練師)】

呢排熱話係講緊領養澳門退役賽犬 — 格力犬 Greyhound。有幾多人對呢種犬種有認識?又有幾多人接觸過?雖然佢哋係好可憐前路茫茫,但不加思索咁就領養,然後仲話傾緊免驗疫入口,到底係咪又係好事?

我非常支持領養,但更支持理性地考慮後再領養,而唔係因為疊馬、威、英雄主義咁走去跟風領養。因為唔諗清楚,其實只係將佢哋由一個地獄搬去第二個地獄,無分別。

廣告

Greyhound 到底係一種咩狗?網上好多描述都只係話佢哋係獵犬、然後咩非常友善,對人對狗對小朋友都超級好。但到底係點呢?我自己接觸得唔多,但呢方面嘅資訊有一位主力推動澳門救格力嘅朋友確認過,佢非常熟悉而且都接觸過場內嘅狗好一大段時間,佢自己都有養。所以都算幾準確。

大約 list 下領養返來嘅 greyhound 會有乜嘢行為或性格問題,再自問有無條件養得掂,然後再諗領養。當然得嘅,希望你哋去馬,幫幫手!

廣告

Sleep Aggression

Greyhound 極常見嘅問題。唔知係由於基因定係遺傳定係賽犬訓練嘅問題,好大部份嘅 greyhound 都有唔同程度嘅 sleep aggression 問題,而呢種問題係極難利用訓練修正而且成功率好低的。你只能用環境管理的方式同佢慢慢磨,磨到佢得。

Sleep aggression,顧名思義即係瞓緊覺時,唔埋得身、唔搞得,甚至有機會行過都唔得。唔得即係點?輕得凶你,重則咬你。就係咁。

「瞓緊唔搞佢咪得囉」可能你會咁諗,都好正路。不過,格力犬一日有八成時間瞓緊覺,然後佢瞓緊覺同唔瞓覺嘅時間,都一樣係攤喺到唔郁同埋開眼的,你分唔分到佢邊一刻係瞓緊? :)

Predatory Behaviour

Greyhound 係視覺型獵犬(Sight Hound),主要以視角追趕獵物然後捕捉。屋企有養貓、雀鳥、兔等等細細隻又郁嚟郁去嘅嘢,最好唔好諗,或者你可以做足 management。雖然唔係100% 會有,但機會都高的。

Predation 即係乜?即係要對方死,早前寫過。

超嚴重社會化不足

賽狗生涯只有訓練同埋跑,完全無社會化可言。所以對人對狗都係,一係就超自閉會閃避會匿埋、一係就超興奮;澳門狗場領養嗰堆係無中間的,一係就好驚一係就好興奮,所以要有心理準備揀邊種都係要慢慢 train up 返去中間位。

因為社會化嚴重不足,所以都好多時會咬嘢、見狗緊張、見人緊張等等,一驚就甩繩,一甩繩就大鑊了。

Touch Sensitivity

格力犬唔鍾意人摸,唔知係社會化問題定係身體結構問題,對人摸係好敏感的。

先天結構保護弱

格力犬無毛髮無脂肪,基本上一定要 manage 好,唔可以同任何狗打交!一打好大機會就超重傷甚至死亡。

關於體力放電

有網上人話要咩好多時間同佢放電,其實都唔係。佢哋體力好差但爆發力好強,反而要問自己可唔可以有環境比佢盡情跑,或者有無閒情成日車佢去跑。如果領養完放佢係屋企的話,佢哋會屈到病的。情緒病嘅下場都係咁上下,唔多講了。

如果你會同佢痴線咁放電的話,唔好多過 5 分鐘,穩陣少少 3 分鐘到好喇。唔係佢哋就會趴咗喺到,你預咗抱佢走了。但咁重嘅狗,我自問抱唔到佢返屋企喇。 XDD

✽ ✽ ✽

睇完都覺得自己可以比到空間、時間同埋 manage 到的話,記得即刻去馬!來緊都仲會有領養日的。雖然目前返港手續上有困難,但應該好快會有轉機。

如果自問只係出於同情心或英雄主義想領養嘅,幫手分享唔同資訊同領養渠道,令有能力嘅人睇到然後救佢哋走,咁樣反而更好。

共勉之。

後記補充:

以前有介紹話利用時間點嘅學習方式(Temporal Conditioning),格力犬喺呢方面係高手。所以佢哋嘅生活習慣係需要好耐先改變到。如果佢瞓開個倉係好早或好夜起身活動的話,你就要有呢個預備係陪佢癲。

 

(標題為編輯所擬,原刊於 Bambiland Facebook 專頁

發表意見