立場新聞 Stand News

綠色債券乜乜乜

2018/7/11 — 21:20

位於新界屯門的污泥處理設施「源.區」。(資料圖片,來源:政府新聞處)

位於新界屯門的污泥處理設施「源.區」。(資料圖片,來源:政府新聞處)

噚日(編按:7 月 9 日)立法會下晝極之緊湊,兵分三路。一邊係公屋街巿公聽會,另一邊係少數族裔權益事宜小組委員會,第三邊係綠色債券決議案的附屬法例小組委員會。

1. 咩係綠色債券?

基本上就係同銀行賣緊的的金融產品,睇落去分別不大。即為「綠色項目」集資而發行的債券。

廣告

問題係,今次係政府發行,仲要係日常的基本工程儲備基金項目。所以不可能是牟利,同埋以目前巨額儲備衡量,無論「綠色工務項目」與否,根本亦無需要集資。

一個商業項目賣債券,可能係唔夠錢興建,或啲錢有更好的用途 — 但放回香港政府的處境,「綠色債券」的主要原因,就係政治手段。美其名係「推廣綠色金融」。即係政府做多啲環保嘢,股東投資收息,基建就得到更多巿民支持,金融界又執一筆,四贏。

廣告

2. 咩係綠色工務項目?

目前冇人講到係咩,金管局人員去到立法會亦只係話構思中。但亦可以參考不同金融機構,主要離不開幾個常見 dimension︰生產或傳送再生能源,減碳,集體運輸,節水,減廢……等等。

正式文件則提到︰「……與可再生能源、能效提升、防止污染及污染管制、廢物管理、水資源及廢水管理及綠色或低碳建築等相關的工務工程均是計劃下發債的潛在工程。」

同埋,要強調的是,綠色工務項目,係一個類別,不是項目。當中會有不同的項目,一定包括值得支持的項目。而且係未發生的東西,所以冇人講得具體,究竟係指咩項目。

3. 環保唔好咩?

環保梗係好,但呢個同時係介入公共財政的新潮財技。

「綠色工務」的定義係咩,並冇寫在將會表決的議案上面,甚至根本冇「綠色工務」四隻字,只有議案註釋才有提及,但都冇定義。即係,政府自行決定。

何況,有綠色元素,不等如就係應該支持的工程。全部港鐵項目,一定符合減碳目標,必然可以成為「綠色工務」。無論係不必要的高鐵、極多爭議的沙中線,一樣係「綠色」。

將來東大嶼要填海,駁通東大嶼的跨海鐵路,亦係「綠色工務項目」,絕對可以透過「綠色債券」集資。

四千億六千億太貴?唔緊要,可以發債集資,仲有好多巿民會支持添。

就像領匯上巿,三跑發債,綠色工務項目一旦發債,必將為財委會的整個審議工務工程的權力,帶來前所未有的微妙前提。

就算未必係一面倒的「大白象」,只要好有爭議性,都會變得相當複雜。財委會程序確係會「照行」,但政府會話某某項目,係符合綠色金融框架的環保要求,並且得到公眾透過投資認授(你班反對派唔好阻住地球轉呀)。

最正係,發債時,其實公眾或機構投資者,係唔會理咩「綠色工務」的,只會直接當係一個主權債券咁去買。佢哋根本不會理會,債券最終係用來做咩項目。

公眾或機構投資者,從投資角度,只需要考慮政府會否倒台,會否冇錢派息,會否還唔到錢,或息口會否太低,有其他機會成本。

根本沒有人會考慮是否「綠色」,有幾「綠色」,係真綠定係假綠,那舊錢最終會否用在爭議項目之上。

4. 發行成本點?

唔知呀!政府聲稱只要通過呢項議案,就可以發債。發債後,財政司司長就自動有權力用錢還息和支持行政費用。

即,就算發債 1,000 億,未來 10 年最終會帶來 100 億利息和行政成本 — 大部分相信會係賣俾機構投資者,即係明益全球金融界或富豪 — 政府都是不需要去立法會尋求任何批准。

5. 發行幾多債券?時限係點?

議案話不可以超過 1,000 億,係指 outstanding amount 不可超過一千億,即係其實如果係短期債,係可以不斷完咗再發行過;總額絕對可以多過一千億。

同埋,議案係附屬法例性質,效力冇時限。

最重要係,按照政府演繹,係發債次數冇上限的。

呢個係好神奇的設計。

預算案係每年通過一次,其他項目係要逐項拎上去財委會傾。

但呢個綠色債券,係可以係冇任何實質內容之下,利用一個議案,一勞永逸,批左就永遠可以做。

政府當立法會係咩?

6. 《借款條例》原文

3. 借入款項的權力

(1) 政府可向任何人借入款項,借入的方式、條款及規限條件由政府與該人以協議議定,而借入的款額及借款的目的則須由立法會藉決議批准。

7. 議案原文

8. 目前立法會討論成點?

呢個係「先審議後訂立」(positive vetting)的附屬法例,理論上冇審議時限,但太少關注的話,亦會俾建制派輕易殺低。附屬法例小組委員會目前由盧偉國做主席,第一次的會議過程可以睇番。

9. 公眾可以做咩?

有個公聽會,7 月 19 日。下週一截止報名。

** 亂寫,如有錯,請指正。

作者製圖

作者製圖


原刊於作者 Facebook

發表意見