立場新聞 Stand News

你會唔會向仔女隱藏財富?

2018/5/23 — 15:00

同朋友傾開教仔,其中一個topic係,你會唔會向你啲仔女隱藏自己嘅財富呢?

我自己就唔會嘅,但我認識嘅人當中,好多人都會。我自己嘅parents,以至好多上一代嘅uncle auntie,都有呢一個傾向。唔好諗住呢個只係有錢人嘅想法,實情係,好多中產都會係咁。

向子女隱藏財富,用意好明顯的:唔希望佢地自細就認為自己有錢有特權,更唔希望,佢地細細個就出入高級餐廳私人會所飛機商務艙… 細細個就食慣好嘢,咁到大個咗點算?乜嘢都試過最好嘞,咁佢將來人生仲可以點突破,點樣得到滿足?

廣告

上面呢個諗法,好難話佢唔啱嘅,at least係非常之政治正確。你如果同人講話剛剛去旅行嘅時候你同個仔一齊坐business class,我保證你即時就會俾人鬧你唔識教仔了。之但係,刻意向仔女隱藏自己嘅財富,我覺得係同時會衍生另一啲問題出嚟。也許唔係即時出現嘅現眼報,但係咪為咗political correct就可以視而不見?

*****

廣告

其中一樣我比較難接受嘅,係當你刻意喺孩子面前隱藏財富,你嘅lifestyle係咪真係配合得到呢?OK,你話與孩子相聚嘅時候,永遠唔去高級餐廳只去茶記同快餐店,但轉個頭你自己就日日去食貴嘢。當有一日個仔真係發現個阿爸阿媽其實唔係佢地吹得咁儉樸,咁點呢?點同個仔解釋呢?作個理由話今日因為有個叔叔請你去食貴嘢所以失「破例」一次?又例如,你同個仔講自己幾窮屋企財政有幾緊絀,但你成個衣櫃都係名牌衫名牌袋… 幾歲人仔也許唔知乜嘢係Chanel Hermes,大多少少好快就知啦。我認識有唔少人,so call向自己嘅子女隱藏財富,但lifestyle完全配合唔到,你以為自己做緊啲好正確嘅事,好識教仔,但afterall完全係自己呃自己,咁其實做乜x嘢呢。個細路大咗,記得嘅,唔會係自己個老竇老母有幾用心良苦咁教自己,而係佢地幾咁虛偽幾咁講一套做一套。

所以,真係諗住用呢個方法去教仔嘅parents,最重要唔係要喺個仔面前講到自己有幾窮,而係要有犧牲自己日常生活嘅準備。你同個仔,係朝夕相對嘅,好多嘢,唔係係咁以做場戲就昆得到佢。你嘅lifestlye本來就係超級儉樸嘅,咁當然冇問題,但若果只係諗住交戲呢… 場戲,恐怕冇想像中咁易交的。

又,有啲人住緊喺半山豪宅,天天靚車出入再加幾個姐姐喺屋企服侍自己,我其實好難明白點解佢地可以喺啲細路面前「隱藏」得到自己嘅財富的… 你真係當個仔係傻㗎咩… (但係佢地話自己得喎…!?)

*****

我嘅生活肯定唔奢華,但亦唔敢講係特別儉樸。lifestyle係咁就係咁,我傾向覺得,面對細路,其實呃唔到的。(呃到都係你自己以為呃到㗎遮…)反而我覺得,你係有呢個財富,就讓你嘅孩子知道囉,然知後努力讓佢明白,富貴過你嘅大有人在;環境比你差嘅,亦有好多。佢地要學識嘅,係世界好多元,而自己所身處嘅環境、階層… 都只係世界嘅一個好小嘅部份,所以要活得謙卑一啲,並且對自己所擁有嘅要常存感恩。

講咁易咩,係咪?我自己呢,講就天下無敵,做就… 唉。

教仔一直都係頭等難事,生得仔就要預咗啦。只係相比起要呃住個細路,仲要呃到佢能夠健康成長學懂所謂正確價值觀,我寧願坦坦白白俾佢知佢老竇平時係點洗錢,再認真教佢點樣好好做人…好似,仲容易一啲。

的確係好難的,共勉之。

 

原刊於作者 facebook

發表意見