立場新聞 Stand News

係乜嘢驅使你哋全家移民呀?

2018/6/21 — 14:59

我記得早幾年,朋友間時不時都有討論有間移民嘅問題。嗰陣時,大家都會問:「喂,你會唔會走呀?」估唔到事隔幾年,大家嘅問題已經進化到成為「喂,你幾時走?」

事實上,呢幾年的確係有唔少朋友,坐言起行咁選擇移民。有財力有本事走嘅,就我身邊嘅朋友而言,我諗起碼有一半係認真地有走嘅打算,而問題,只係「幾時」。而「幾時」嘅答案,好大程度上取決於,佢哋嘅子女有幾大。升中係一個幾 common 嘅 timing。但有部份也會比原定計劃來得走一啲,原因係,佢哋發覺子女小學嘅生活,遠比佢哋原本所預計嘅來得「慘烈」,為免子女受罪,都係早啲撇有著數。

一塌糊塗嘅教育制度,固然係好多香港父母決定移民嘅主要原因。但移民代表要放棄香港擁有嘅事業,去外地重新開始。呢一個留戀,正正係好多人選擇唔移民留低嘅原因。教育制度唔好,如果你反正有錢,可以選擇齋送細路出國留學而自己繼續喺香港搵錢。九十年代嘅移民潮,當時嘅港人喺電視畫面度見到嗰年六月喺北京發生嘅事,集體淆底,先逼住要離鄉別井搞移民。即使係咁,當日嘅移民家庭,仍然有大量嘅所謂「太空人」存在,即係個男嘅依然留喺香港為事業搏殺搵錢,老婆仔女就去外國坐移民監同讀書。結果當然係造就咗無數破裂嘅婚姻,但說明嘅,係當時嘅人,喺政治環境以外,仍然相信香港喺搵錢方面,係有前景同有機會嘅。

廣告

現在呢一水嘅移民潮,也許未及當年嘅規模龐大,但我卻絕少聽到佢哋會以「太空人」嘅形式移民。男嘅,縱使正處於事業嘅黃金時期,當決定移民之際,仍願意狠心放棄香港事業,陪同老婆仔女一齊離開香港。咁係乜嘢驅使佢哋有咁嘅決定?哈哈,係愛?定係責任呀?(肯定唔係因為窮啦啩呢次?)

我同移民嘅朋友曾經傾過,佢哋覺得,社會形勢使然,本土香港人,即使留返喺香港,其實事業嘅前景都唔會見得特別好。政府嘅政策,以至整個國策,長遠嚟講都係對土生土長嘅香港人不利…(除非你真係相信返大灣區發展有前途啦…),呢個前提之下,要放棄喺香港嘅事業,其實冇想像中咁難。

廣告

另一方面,呢段時間有本事移民嘅人,所受嘅教育,以及佢哋嘅視野,相比九十年代嗰批,都相對地國際化得多。當年嗰批離開香港之後唔知可以撈乜,所以做「太空人」多少係被逼的。今日走嗰一批,即使移民外地,仍然有本事可以有嘢撈。好唔好得過喺香港?好難講嘅。以前人哋話,喺外國生活要做二等公民又要受到歧視,挑!留返喺香港你估會唔係一樣咩。

仲有一樣幾唔同嘅係,九十年代移民嘅人,由決定移民一刻開始,好多心裡面,都諗住有回流嘅一日。移民,只係要拎返個政治保障。拎完,你大陸怕且都奈我唔何啦,咁我就返嚟搵大錢囉!今日決定走嘅,我真係冇聽過任何一個有回流嘅計劃…至少呢一刻係完全冇。由佢哋自己,以至佢哋嘅細路,佢哋都相信,現在呢個環境,並唔係屬於我哋呢啲土生土長嘅本地人。即使得到政治保障之後,返嚟都唔見得有好處。事實上,當日常語言要講煲冬瓜,學校逼你用簡體字,社會乜都講關係多過講制度,所有有利土生香港人嘅環境,其實都在日漸消失。這當然是人為,然而香港人在自己嘅城市之所以有機會有前景,係因為呢個城市嘅環境同各樣軟件,係有意無意地設計成有利本地人發揮。然而今天,以至將來好大段嘅日子,呢個城市嘅各樣軟、硬件配套,究竟係為誰精心設計?其實大家都心裡有數吧。

所以今日選擇走嘅人,點會諗回流?上一代人回流了,結果係咩呢?咪係要再走多次囉。

 

(標題為編輯所擬,原刊於作者 Facebook

發表意見