立場新聞 Stand News

唔賣板燒雞 其實同紅色資本無關

2017/3/14 — 12:58

上星期麥當勞停售至尊漢堡、足三両和板燒雞,消息一出,哀鴻遍野,誇張過林鄭當選特首。

不少媒體亦將此事與今年一月香港麥記被中資集團收購一事扯上關係,留言紛紛指責係紅色資本的錯。

但其實留意番近年麥記的策略,就會發現和紅色資本其實沒有多大關係。

廣告

1,餐單高檔化(Menu Premiumization)

廣告

麥記在香港有240間分店,真係梗有一間喺左近,所以分店數目和人流都已經接近飽和。要繼續增長銷售金額,就要增加人均消費。所以早在2015年4月,已有外國傳媒報導麥記開始出多左貴包。[1]觀乎香港,自2015年底起就不斷推出貴價的漢堡包,包括2015年和2016年和楊尚友合作的足三両和安格斯漢堡系列、推出雞翼拼盆、自選漢堡等餐價超過$35的食品,更遑論金鐘有沙律吧那間高檔麥記。試左好幾次水溫,今次再進一步,停售部份銷量較低的餐,其實不太意外。

P.S. 今次Signature系列的芝味蘑菇安格斯其實和2015年與楊尚友合作的足三両和安格斯漢堡系列都推出過,當時名為瑞士芝味安格斯漢堡,並大受歡迎。

2,多雞少牛

這個策略由上任麥記CEO Don Thompson 2012年開始講[2],要出多啲雞,少啲牛。一係因為牛的成本比雞貴好多,所以要保持到平價,就要出多啲雞。二係因為雞俾人感覺健康啲,幫助麥記「健康啲」的形象。

而新的signature系列有兩個雞包,一個牛包,停售的就是兩個牛包和一個雞包。

銷售角度講完,營運角度睇,停售亦是因為前線能夠承受的餐單種類有上限。早前推出全日早餐,前線幾乎崩潰。同時所以今次出三個新包,就乘機停幾個少啲人叫的包,

當然點解係停售呢三個包,而唔係其他,就關乎到銷售額、象徵意義(你諗下如果麥記話停售魚柳bell同豬柳強?暴動都似)、整體產品的分佈(高、中、低價產品吸引不同顧客)等等一系列的因素,在此不作詳談。

所以,呢個只係一個makes perfect sense的商業決定,和是否轉成中資無關。

當然,作為消費者,我都係會講「還我板燒雞」!

2016年和楊尚友合作推出的安格斯漢堡系列

2016年和楊尚友合作推出的安格斯漢堡系列

 

注:

[1] The StreetBusiness Insider

[2] Business Insider

發表意見