立場新聞 Stand News

最幫得我手嘅同事,都係最初賣相麻麻地…

2017/10/6 — 18:48

//我所講嘅「賣相」,絕對唔係講個樣好唔好睇又或者身材正唔正呢亭嘢,而係佢見工時嘅嗰份履歷,對好多人嚟講係「唔好睇」。// 
資料圖片,圖片來源:《29+1》劇照

//我所講嘅「賣相」,絕對唔係講個樣好唔好睇又或者身材正唔正呢亭嘢,而係佢見工時嘅嗰份履歷,對好多人嚟講係「唔好睇」。//
資料圖片,圖片來源:《29+1》劇照

我發覺,公司裡面最幫得我手嘅同事,都係最初賣相麻麻地的。

嗱,唔好鬧我住。我所講嘅「賣相」,絕對唔係講個樣好唔好睇又或者身材正唔正呢亭嘢,而係佢見工時嘅嗰份履歷,對好多人嚟講係「唔好睇」。冇名校背景冇浸過咸水冇做過勁揪嘅大公司 … 總之簡單啲講,就係冇咗一陣「精英」除。

吃不到的葡萄是酸的,我唔 buy「精英」,係因為,做生意之初,跟本請唔起呢班「精英」,而呢班「精英」,亦睇唔上我間公司仔,跟本冇機會請得到佢地。於是呢,就唯有請返一班,所謂賣相麻麻嘅同事返嚟了。後來公司長大咗,開始「有本事」請啲「精英」啲嘅同事返嚟啦,發覺,真係時辰八字同我唔係好夾。

廣告

「精英」有精英嘅做嘢方法,好多我覺得係喺大公司裡面做慣咗,而留落嚟嘅壞習慣。我哋公司唔大,但市場訊息幻變,好多嘢需要反應快,行動快。精英們總係將許多事情 email 來 email 去,我睇住佢地嘅 email,英文寫得亮麗無比,咬文嚼字,如果係我寫的話,可能大概要花一頭半個鐘先可以雕啄到呢個咁高文學水平嘅電郵出嚟。之但係,一個 internal 嘅 email,雕啄到咁嘅水平,難聽啲講,真係把L咩。最難忍受嘅係,佢個 email 睇完之後,靜靜地諗一下:「其實佢up咗啲乜呢?」

寫email大概之係其中一個例子,但呢班人俾我嘅感覺,係每日都好努力去做嘢,但係你硬係唔知佢做咗啲乜嘢出嚟,響一啲好簡單嘅事情上面兜嚟兜去,日子久了,你覺得喺佢哋手上面嘅事情幾乎全部係原地踏步。

廣告

仲有另一個頭痛嘅問題係,呢班人,好多都唔係咩衰人。心地好多都唔差嘅添。你請咗個人又衰心地又衰嘅同事,如果佢做得唔好,解決方法反而好簡單,送走佢就係啦。但係你遇著呢班心地好嘅「精英」,佢每日咁「盡心盡力」同你原地跑,你固然係睇到眼火爆,但你又唔忍心一嘢送走佢,而佢貌似好勤力咁嘅做事態度,又的確感動到唔少身邊同事 … 嘩X!… 你條仆街老細人哋仆心仆命幫你做嘢你都唔滿意仲想郁佢 … 你堅係冇良心呀X!

講到尾,真正嘅「精英」響市場上係非常少的。我有咁嘅經驗,只係因為,我請咗啲「疑似精英但實際並唔係精英嘅偽精英份子」咁解。真正嘅精英,其實冇樣睇的。反而係要慢慢發掘。有啲人,個底係好叻的,但礙於背景同出身,好多時連佢地自己都唔知道自己原來係好勁揪的,直至某些機會出現,讓佢地喺半推半就嘅情況之下發揮到小宇宙,然後先驚覺自己原來骨格精奇天生異稟。這些人我有幸遇到一啲,遇到嘅時候,堅係要好好珍惜。

人好衰嘅,有時總係對某種賣相嘅人,先覺得佢夠 professional,夠 international,夠格調。外表嘅嘢,包裝嚟架遮,坦白講作唔到準的。我係 cheap 佬一名,我個人嘅經驗係,賣相越正,中伏機會往往越大 … 嗱,我真係唔係講個樣呀吓。

祝大家有個愉快嘅週末。

(標題由編輯所擬)

發表意見