立場新聞 Stand News

最矛盾嘅一輯《跟住矛盾去旅行》

2016/5/3 — 0:41

《跟住矛盾去旅行》截圖

《跟住矛盾去旅行》截圖

曾主席同長毛,Amanda 同海星老師,葉蘊儀同 Shiga,《跟住矛盾去旅行》做咗 3 pairs,有人話「唔好俾佢啲假矛盾呃咗」。當你睇完林日曦同蔣麗芸嗰集之後,你就會發現呢個節目嘅「矛盾」,已經升級到一個點,唔止係兩個嘉賓嘅事,而係嘉賓同電視台嘅矛盾!

Viu TV 未開台已經係咁宣傳《跟住矛盾去旅行》,係人都知呢個係個新電視台嘅殺手鐧。節目未出場,林日曦 vs. 蔣麗芸聽落已經叫人無限遐想。一個媒體嘅老板,去另一個媒體度做節目,當然唔會好似黎明咁,只係因為識你老板咁簡單。林日曦上《矛盾》嘅意義,就係要示範嘉賓唔係上嚟俾你啲「假矛盾」玩,而係要製造「真矛盾」。

廣告

一開場,林日曦就同個翻譯講,講唔想同蔣麗芸直接對話,「唔想語氣影響溝通」,想佢幫手做「廣東話翻譯廣東話」。個翻譯一聽就話:「咁你即係搵我嚟玩」。後來,林日曦同蔣麗芸見面,蔣麗芸一句「宜家啲後生真係難溝通」,「激到」林日曦走出酒店,佢答工作人員第一句係:「唔係要你哋難做」,就知道今輯《矛盾》有幾「矛盾」。矛盾已經升級到,唔係兩個嘉賓嘅事,而是嘉賓同製作單位嘅事,超花生。

第一回合,林日曦完勝。開場有東方昇、Dickson 佢哋係度講自己腦細;林日曦一到埗首爾,就同留韓港人食街邊檔,好似粉絲活動咁,好鬼親民,好鬼 nice。佢第二日一早仲專登要去隔離,一間高級啲嘅酒店接蔣議員,廢青好似佢咁,真係「好有禮貌」(一如佢自己話嘅,一切只係語氣問題)。

廣告

睇 100 毛有幾紅,就知林日曦有幾叻。無論係呢個時代嘅 YES 又好,呢個時代嘅號外都好,100 毛由雜誌到毛記電視,你係邊度都可以見到毛毛嘅蹤影。100 毛無 Viu TV 咁勁,有強勁嘅水喉,搶到大氣電波,但佢唔駛自己 own 個台,都可以係電視台度出現。

林日曦肯上你節目,開宗明義講到明「我係當去公幹,唔係旅行」。佢話唔要同另一個嘉賓「直接對話」,你敢唔敢 say no 丫?成集個畫面都分成兩半,唔係上下,就係左右。兩個嘉賓都無乜直接交流,無交過手,又邊度嚟矛盾?睇完成粒鐘,畫面上個矛盾位,係林日曦同個翻譯。但翻譯姐姐都只係打份工啫,佢都係被人擺上枱,「真矛盾」係請佢返嚟果個 Viu TV,同嘉賓林日曦之間嘅恩怨情恨。

得罪講句,蔣麗芸成集只係配角,上《矛盾》,但「矛盾」就無佢份囉。可以計下 air time 邊個多啲丫~越諗越似 100 毛特約《跟住矛盾去旅行》之林日A大戰蔣元秋!

林日曦點解會上《矛盾》?我真係好想知道中間係咪有咩 deal 喎!

發表意見