立場新聞 Stand News

每一個男孩子圈子裡面 總充斥住技安、大雄同牙擦仔…

2018/7/6 — 15:10

圖片來源:《叮噹》

圖片來源:《叮噹》

我個仔讀男校,而每一個男孩子嘅圈子裡面,總會充斥住技安、大雄同牙擦仔(得嘞,我知我老,我知依家唔係咁叫嘞!)幾個角色。欺凌嘅嘢,多多少少總會有啲,視乎程度咁解㗎遮。

阿仔間學校,我認為其實算係相當乖,但每間學校總有三幾個小霸王。你唔好彩俾佢哋睇中,你嘅小學生活就恐怕唔會過得太過愉快。所以,做大人好做細路也好,其實都係要學識保護自己。而真正能夠保護自己嘅方法,往往都唔係好 politically correct 的。

囝囝同我細個一樣,又矮又瘦。細路仔搵人去恰,首先都係以貌取人。我呢個仔,外表上有齊哂所有俾人恰嘅條件,所以應該係「高危」一族。入小學之前,我同佢講:「仔,要唔俾人蝦,得兩個方法嘅咋。第一個,正路啲嘅,就係識多啲 friend,識多啲兄弟。」我嘅童年,其實都係用呢個方法生存。多朋友,冇被人孤立,被欺凌嘅機會自然相對少。即使俾人蝦,你 friend 多,你拖馬出嚟兇一兇人,對家都會收斂。細路仔嘅技安,得個樣嘅啫,欺善怕惡係佢本性。知道你兄弟多,通常都唔敢搞你嘅。

廣告

老婆同我講笑,話我講到好似黑社會咁。我話,男孩子嘅世界,其實真係有啲似黑社會㗎喎。你吓吓要做紳士講禮貌講政治正確,通常死得好慘㗎。「第一講咗,咁第二呢?」老婆問。「第二仲簡單,真係俾人𢱕的話,記住還拖囉。」以暴易暴,唔得㗎喎,老師罰㗎喎。「係呀,罰都要還拖,還過一次人哋唔敢再𢱕你,老師都係罰你一次咁大把,但你唔還拖,分分鍾俾人𢱕足六年。」老師話,遇到咁嘅情況,要嗌「請你停手」然後將事情話俾老師聽。痴 L 線嘅,你俾人𢱕緊你嗌人停手會有咩結果?𢱕你嗰件蛋散只會越𢱕越起勁,你嗌停手人哋𢱕多你二錢重啦下話?大佬,教人嗌停手都算啦,重要教人禮貌地加上「請你」兩個字,英文版係咪應該叫「Would you please kindly don't DUP me?」係咪有病?好啦,有禮貌地請人唔好𢱕自己之後,再去同老師交待發生咗咩事…屌,我細個嗰陣,就係一廂情願地相信老師會公平公正地為我解決呢啲事情,俾人𢱕完之後搵老師幫忙。不過你係「告狀」嗰個,老師認為你俾咗額外麻煩佢,條氣超唔順,兼且欺凌呀、打細路交嘅嘢,佢又唔係親眼睇到,可以點「主持公道」呢查實?咪巡例各打五十大板算數囉。Oh sorry,你告狀吖嘛,搞到老師我咁 x 麻煩,嘿,罰多你三十大板等你下次知訂。俾人𢱕完,然後罰得仲甘過𢱕你嗰條死肥仔。呢啲咁嘅經驗,你細過嗰陣試過未?

細路仔嘅事,就細路仔了吧。有幾多友誼,其實係你𢱕吓我我又𢱕吓你咁𢱕出嚟吖?女孩子嘅世界或者唔係?但男仔嘛,打打吓交就大㗎啦。乜都要好似好乖好乖咁,郁啲又話要搵老師呀、家長呀幫手解決,班細路點樣長大?

廣告

最近聽到個笑話(對當事人嚟講應該笑唔出的…),話說阿仔上年有個同學,成日俾啲小霸王𢱕。佢阿媽教佢,點都都唔可以還手,就連「擋」都唔可以。咁 standard procedure,咪就係要同𢱕你嗰個講「請你停手」然後「告狀」俾老師聽囉。一年過去,個𡃁仔俾人𢱕到日日以淚洗面啦,嗰幾個小霸王,咪巡例俾人警告吓,然後各自 life goes on…即係繼續𢱕你。佢呀媽最後決定幫個仔轉校。我嗰陣心諗,佢哋呢間學校,已經算係好乖嗰隻,即係啲小霸王𢱕你,都係「有限度」地𢱕,唔敢太過份的。如果連呢間都頂唔順的話,出面啲學校,你點捱呀?

好啦,最近,又見返呢個同學仔嘅媽咪。成年冇見,咁都一定會問吓,轉咗校之後點呀?仲有冇俾人恰呀?

你哋估有冇吖?

「唉,出咗去出面,先知道以前間學校原來好乖好斯文…希望求吓校長可唔可以轉返嚟啦。」

「新學校啲同學仔𢱕得佢好勁呀?」我問。

「係呀,仲勁過以前呀…所以今年我『批准』佢喺俾人打嘅時候用手擋。」

聽完,有好幾秒我真係講唔出一句話。痴 L 線的,連自衛都要你 approval,唔怪得你個仔成日都俾人𢱕啦。

「批准」埋佢還拖啦,好嘛?

 

原文無題,題為編緝所擬,原刊於作者 facebook

發表意見