立場新聞 Stand News

父母可如何幫助孩子實現夢想?

2017/6/18 — 20:41

相:America's Got Talent片段截圖

相:America's Got Talent片段截圖

父親節正日,讀著網上許多有關九歲妹妹的comment時,讓我有點思考的是,做人阿爸阿媽,究竟如何幫助孩子實現夢想?

追夢,係有代價的。用不同嘅方式追夢,所以付出嘅代價同風險,亦有所不同。然而每個成年人,都在為自己的決定負責,打死無怨。成年人要為自己決定負責,咁,細路仔呢?

細路仔都有夢想。然而當佢地嘗試去實現夢想嘅時候,有冇好心人會提醒佢地,每個夢想都有代價,而人係要為自己嘅選擇而承受結果?我諗,呢個係每個父母必須要教識孩子嘅做人概念。孩子只知自己在追逐夢想,但卻冇考慮過要承受甚麼代價的話,這個夢想,其實好虛的。我意思係,當你清楚夢想係要付出代價,而即使付出代價也願意去追自己嘅夢,這個夢,才算得上係實淨。

廣告

小孩子能否明白呢個道理?到幾大先會明白?我不得而知。可能有啲細路,幾歲嘅面孔,有幾十歲人嘅心智?然而就算真係有,你驚唔驚?

另一個問題,係追夢嘅方式,由邊個去定?由父母去定,抑或由細路自己去定?當現在越來越多聲音,說要去尊重孩子嘅決定嘅時候,成年人繼續幫細路揀學校揀出路…唱歌嘅幫你揀經理人揀幾時上咩台出咩show,又查實算係,幫助孩子追逐夢想,還是在背後操控孩子嘅夢想?

廣告

呢個問題,可能永遠都講唔通。做父母嘅,唔幫孩子做決定,人地話你唔負責任,到你幫孩子做點決定,又話你唔尊重佢意願。但可以肯定嘅,係孩子嘅一生之中,總不能避免有父母幫自己做點決定嘅時候。做父母之所以難,除咗怕這些決定會做錯之外,還要逼自己盡量為孩子做少點決定,特別是那些會過早將孩子的將來定型的decision。

我在想,在孩子長大之前,父母這些決定的基礎,大概只能夠是盡量留多一點選擇餘地,給未來的他們吧。

祝大家父親節快樂。

發表意見