立場新聞 Stand News

獨男節日最忌無自信

2016/12/25 — 16:19

資料圖片

資料圖片

又到大時大節,總會想起前塵往事。

以前大學每逢大時大節,追求既係搵人一齊普天同慶:少至一個,多至十數個,出外花天酒地通宵達旦,酒醉昏迷至死方休,放題酒聚通K亦道平常。

學《激戰》賤輝話齋:「我同你呢個年紀,仲有嘢需要人明咩?」。

廣告

步入中壯年,心境同體力都大不如前:遇上大時大節,有些少行動力既就會走出城市,到郊外國外尋找工作以外既歡樂小天地;無行動力既,留喺屋企享受幾日寧靜時光,或者偽文青上身,匿藏於隱世咖啡小店。對於中壯年之人嚟講,通頂有如一次過碌爆幾張卡,一頂換來數日疲態,得不償失。

好多節日,中壯年單身友(包括我)都可以處以泰然,因為有啲日子屬性只係星期六日「威力加強版」-阿哥,你無聽過清明重陽復活節放假要專登搵人慶祝先。但有啲日子,總係帶有強烈排他性-好聽啲就戀人限定,難聽啲就單身友自己搵食。

廣告

而聖誕節,尤其係平安夜,簡直係邪惡軸心節日既表表者。作為專業單身人士既我認為,戀人限定日子,有無人陪都係其次(好似係),問題出於有無飯食之上。

喺極具排他性日子,食肆餐廳為左谷生意擦業績梗係搞盡綽頭,肯肯定推出「刻骨銘心初戀金銀情侶套餐」既玩法,仲要收埋平時Menu唔俾揀其他,等各情侶戀人(甘心)奉上銀包中伏。放心,單身友呢啲日子銀包從來唔會中伏,事關食肆餐廳一早擺出「單身友(與狗)不得內進」既姿態,加上閃光彈地雷處處,俾你搭到檯你都會逃之夭夭。

獨男節日最忌無自信,要搵返自信,辦法就只有一個:搵三哥。大時大節入三哥,無人理你單身定雙失,亦無需要好似平日咁俾每日budget限死,可以抱住「大時大節食好西」既心態,盡情嚟個三哥放題-今晚要皮蛋有皮蛋,要青瓜有青瓜,要土匪有土匪,要白肉有白肉,從來唔需要驚三哥會出個節日限定menu鑿你一筆。

熟悉既檯櫈、熟悉既阿姐、熟悉既口音、熟悉既燈光、同埋熟悉既味道,簡直係令你喺最唔熟悉既日子,搵返屋企(同女友)溫暖既感覺,嗚丫!食完,埋單,拎返件褸步出門口;果一刻,你唔單止係一個浪子,亦係一個充滿霸氣(同口氣)既浪子。街裡愛人一對對?so what!

可惜,好景不常。筆者目測發現因為經濟不景氣,越來越多情侶揀喺節日排三哥同單身友爭飯食。作為單身專業功能組別既得利益者,都係奉勸各位拖住另一半睇緊呢個post既朋友:

「都係俾錢去高級餐廳食你地既聖誕大餐放你地既閃光彈啦!」

 

發表意見