立場新聞 Stand News

畫蛇添足:兇手還未睡

2017/8/22 — 17:36

《兇手還未睡》宣傳照

《兇手還未睡》宣傳照

年份:2016年
導演:邱禮濤
演員:林家棟、許志安、文詠珊、余安安

官方劇情簡介:

小學教師方慕哲(許志安 飾)因愛妻自殺身亡而陷入頹廢,他將疏於照顧的寵物狗送往愛護動物組織時,遇上組織創辦人兼富家女曾斯敏(文詠珊 飾),二人之後透過參加義工活動而建立友誼。

廣告

生活無憂的曾斯敏被家人安排「門當戶對」的婚姻,要嫁給超級二世祖李偉臣(林家棟 飾),令她本身空白的人生意義更雪上加霜。就在婚禮前一星期,她擔心未來老公可能背她偷食,同時自己又對方慕哲念念不忘,於是趁一個雨夜拜訪方慕哲,希望可以發展進一步關係,可惜對方仍未走出感情谷底,加上身世差天共地,令她慘被拒絕。

感情生活接連受挫的曾斯敏回家時,遇襲昏迷,回過神時發現自己被全裸囚禁,更懷疑被性侵犯。而在禁室外就經常播放經典歌劇《杜蘭朵》(Turandot)中的名曲《徹夜不眠》(Nessun Dorma),似乎襲擊她的人仍然未睡…

廣告

───

寫《阿嫂》嗰陣,我提出以下論點:

1. 『爛片嘅劇情「不知所謂」。不知所謂,又可分為三個層次:中級係『無病呻吟、無的放矢、無中生有,懶有嘢、扮晒高深、只求營造「你睇唔明係你無深度」/「睇得明先係識睇戲」嘅感覺。』

2. 『演員演出差勁……可能令套戲唔好睇,但唔會搞到佢爛。』

今次介紹嘅《兇手還未睡》可謂中級爛劇本嘅表表者,劇本空洞但又要拍到懶有嘢。不過,喺講個劇本有幾扮嘢之前,我要認個錯:

一個演員差勁,套戲未必爛;不過!!當男女主角都演技差,套戲就仆硬街。

《兇手還未睡》嘅男女主角分別係許志安同文詠珊。許志安作為歌手,唱功一流,華星年代嘅歌我首首都識唱,遠古至徹夜纏綿、翻騰,後嚟嘅雨後陽光、喜歡你是你,到爛泥、一家一減你,真係唔使睇歌詞。可惜佢無乜personal character,毫無突出嘅風格同性格,搵佢演戲真係害撚咗佢(類似嘅仲有李克勤同容祖兒)。1996年有套《金田一手稿之奇異檔案》,夠膽搵許志安演智商超群嘅金田一……許志安亦不負眾望,演繹出一個十足十弱智兒嘅金田一。

許志安只可以做一啲戇戇居居嘅宅男/交上惡運嘅配角,要好似喺《兇手還未睡》入面扮演既變態又有計謀嘅男主角,真係玩鳩佢、虐待觀眾、浪費投資者金錢,三輸,全部人都輸,結果佢亦完全演唔到應有嘅陰沉同變態感。以戲論戲,如果林家楝(戲中配角,文詠珊老公)同許志安嘅角色調換,效果肯定大有改善。

至於文詠珊……演技一直出類拔萃:無論做乜嘢角色,都能夠令觀眾投入唔到套戲。喺《寒戰》永遠只識碌大對眼;《大追捕》完全唔知做乜;佢連喺《內衣少女》扮MK妹都扮得唔似-但佢本身係一個MK妹!領過無數咁多次嘢,似乎佢有份演嘅戲,已經浪費劇本一大半。

我老媽成日講:「有啲人做戲就真係做緊戲。」簡直係講緊文詠珊。我明白佢唔想做一個花瓶,努力訓練演技之餘,不如剪短頭髮先-過去十幾屆金像奬影后,大部份都係一直短頭髮/試過短頭髮。短髮畀人一種強悍,堅強嘅感覺。呢樣嘢講咗好多次。連《權力遊戲》嘅太后都要因應潮流剪短頭髮,明未?

同為爛片,《阿嫂》演員陣容嘅叫座力係100,許志安搭文詠珊嘅《兇手還未睡》,叫座力係零。寫過嘅爛片中,叫座力同呢套旗鼓相當嘅,只有薛家燕同孔慶祥嘅《我阿媽發仔瘟》……事實上,許文人喺戲中嘅表現,乏善足陳,文詠珊完全演唔出應有嘅慘情,有幾幕佢畀兇手侵犯,不但勾唔起觀眾嘅同情,反而覺得佢好煩同抵撚死……仲有無數咁多幕,我聽唔清楚文詠珊、許志安講對白,要來回聽幾次,再搵字幕版先知佢哋講乜。

最遺憾嘅係,文詠珊好似唔知個角度最大嘅發揮,係喺作出「選擇」上面,演繹唔到心裏面嗰幾種掙扎同痛苦。文嘅角色有五六個位有機會發揮演技,表現心底掙扎:

-結婚前一晚,見唔見舊情人許志安
-見到許志安之後,同唔同許志安扑嘢
-打唔打畀Angelababy(講笑,無呢幕)
-畀姦後講唔講畀阿媽知、報唔報警、繼唔繼續結婚
-離唔離婚
-個強姦犯message佢,佢同唔同佢講嘢、跟唔跟佢指示偷林家楝個電話
-最後,同唔同許志安合作,殺死林家揀

好恐怖。套戲表達文詠珊做呢啲決定時,好似理所當然,諗都唔使諗咁,白白浪費一個又一個黃金機會。

───

演員陣容弱雞,已經大大降低我對呢套戲嘅期望。結果拍出嚟點呢?我只能講句眼高手低,劇本同導演同樣未達最低期望:

定位模糊:呢套係一套劇情片定係懸疑片?開頭出現咗兩個兇巴巴/陰沉嘅角色(管理員同司機),講啲對白懶有伏線,再失驚無神嚇鳩你,似乎導演編劇係想製造疑團,等觀眾估下邊個先係最後大佬。文詠珊嘅驚嚇回憶中,司機個樣出現咗0.1秒。點知呢兩個角色無端端就失咗踪,套戲連僅餘嘅疑團一下消失晒。劇情片又嫌幾個主角嘅內心戲嚴重不足。

名不乎實:套戲用上意大利歌劇《徹夜不眠》(Nessun Dorma),連戲嘅英文名都叫Nessun Dorma。但除咗第一幕眾人去睇呢套戲、個強姦犯會播呢首歌之外,Nessun Dorma嘅故事同《兇手還未睡》嘅劇情,有邏輯關連嘅連少少都冇……

個人認為最搞笑嘅係,雖然套劇叫《兇手還未睡》(Nessun Dorma;意大利文係「徹夜不眠」),成套嘅人都喺度不斷瞓覺:

-第一幕,文詠珊喺醫院昏迷
-林家楝話睇歌劇差啲瞓著
-文詠珊畀人捉咗,醒之前都係瞓著(後面呢句係廢話嚟,套套邏輯)
-文詠珊畀兇手放返,喺架車度瞓著咗
-文詠珊瞓覺發夢畀林家楝害,夢中佢都係瞓喺度(!!!!瞓覺嗰陣發夢自己瞓緊覺!!!)
-林家楝扑完嘢喺屋企瞓覺(結果畀文詠珊偷咗手機)
-文詠珊殺完人瞓覺
-劉浩龍喺屋企又係喺梳化瞓緊覺
-文詠珊畀人落藥之後喺醫院昏迷(ok,佢係昏迷唔係瞓;呢幕同第一幕呼應)

啲演員每隔幾分鐘合埋眼一次,仲好意思叫「徹夜不眠」?

畫蛇添足:劇本太多無意義嘅枝節,最離譜嘅係個結局!話說:

-故事一路都係講許志安個老婆幫林家楝打工,但畀林家楝強姦咗,最後仲自殺死咗,於許志安就去強姦文詠珊(林家楝老婆)報復;

-去到結局,原來個老婆畀人強姦嘅,係劉浩龍!而劉浩龍喺老婆死後就自殺死埋。真相係劉浩龍老婆個阿哥、叔仔許志安幫佢哋兩個報仇,走去扮劉浩龍,然後強姦文詠珊報復。

嘩,屌!真係多鳩餘!從劇情嚟講,實在無需要喺結局創造多一個角色出嚟。我諗咗好耐,唔知點解要懶突破、懶出人意表咁,話許志安其實係另一個人。個結局(許志安假扮死咗劉浩龍去作奸犯科)無伏線、無必要、唔合理,為出人意表而出人意表,仲仆街過《廿世紀少年》個結局「你就是勝田間?」。

套戲當然仲有其他問題,例如主角性格矛盾-許志安係想陷害文詠珊定點?佢究竟係勇於承擔責任定係想逃避?另外,由於畢直所限,戲中嘅有錢人嘅衣著、背景、口吻,完全無說服力,去一間殘到仆街嘅教堂行禮、擺酒喺一間普通會所擺。相比起結局多舊魚,呢啲都算小問題。

養份時間:如何翻拍《兇手還未睡》

相比起意大利歌劇《徹夜不眠》(Nessun Dorma),戲中有一個統計上嘅問題更有意義,叫 Monty Hall Problem:

-有三道門(ABC),門後各有一樣嘢,其中一道門後面係奬品,另外兩個係垃圾;
-你可以選擇其中一道門(例如A)。揀咗之後,主持人會喺你無揀嘅兩道門中間,打開一道垃圾門(例如C)。
-而家有兩道門未開(A and B),有一道門後面有奬品、另一道係垃圾,但你唔知邊度打邊度門;
-主持人畀個機你會再揀多次,可以揀唔轉門(繼續揀A)、或者揀另外未開嗰度門(轉揀B)

問題係:轉門中奬嘅機會率大啲,定唔轉中奬嘅機會大啲?(註)

直覺話你知,得返兩度門,一道門有奬、一道門垃圾,50/50,轉或唔轉中奬機會率一樣,50%。

不過,已經有人證明過嘅事實係:

轉門嘅中奬機會係2/3、唔轉嘅中奬機會係1/3。

點解係咁,大家去返維基或google下 Monty Hall Problem。《兇手還未睡》中,許志安曾經表演過Monty Hall Problem一次。之後好似司機同管理員一樣,無再出現。其實Monty Hall Problem可以套用用喺文詠珊嘅身上

「當你第一次揀完,有得再揀,應該轉定唔轉?」

上面講到文詠珊可以作出嘅抉擇,可以完全套用Monty Hall Problem。如果只用一次,就應該係劇尾文詠珊發現許志安係兇手之後,許志安邀請佢殺林家楝,文詠珊腦海浮現起兩個選擇:

-繼續錯落去,整死林家楝(唔轉選擇)
-回心轉意,舉報許志安(轉選擇)

個劇情就好好編:

-第一種可能:文詠珊選擇無變,貫徹喺戲中死唔認錯嘅性格,夾手夾腳殺死林家楝。結局,許志安依然將啲罪名推落去文詠珊,就可以呼應返Monty Hall Problem嗰個「你唔改變選擇就會較大機會錯」嘅主旨。

-第二種可能:文詠珊喺千鈞一髮中,諗起Monty Hall Problem,知道改變選擇嘅勝出機會率較高,於是暗啞底通知差佬,出賣咗許志安。

只要捉緊Monty Hall Problem作為故事主旨(而唔係乜嘢意大利歌劇),劇情會正常啲,有意思啲。

當然,要套戲正常啲,第一件事梗係換晒男女主角-李克勤同容祖兒就good fit.

(呢篇文嘅配圖都好正,「挑戰感觀極限」。真係睇到叫救命)

註:
https://zh.wikipedia.org/wiki/蒙提霍爾問題

──────────────────

【港產爛片系列】
-《阿嫂》https://goo.gl/cI7kHo
-《我阿媽發仔瘟》https://goo.gl/JG2i49
-《王老吉、OSIM特約:女人本色》https://goo.gl/DnbXJA
-《內衣少女》 https://goo.gl/3FNXgN
-《神龍賭聖之旗開得勝》 https://goo.gl/qOj5UK
-《遠離寒戰,冚家保平安》 https://goo.gl/MT5RSE
-《穿屎主演,必屬爛片:見習黑玫瑰》 https://goo.gl/FxTfvk
──────────────────

文章硬插廣告時段
不要問,只要like,仆街史兄的專頁同IG。
Facebook : https://www.facebook.com/Relgitsjg
IG (主要用嚟睇女仔) : https://www.instagram.com/iamuncleshit/
Project HK 專頁:https://www.facebook.com/PROJ.HK/

發表意見