立場新聞 Stand News

行山露營朋友 considerate 少少 得唔得先?

2017/1/3 — 17:02

聖誕長假期期間,港島鶴咀一帶,遊人眾多。

聖誕長假期期間,港島鶴咀一帶,遊人眾多。

自從上星期有郊遊人士面書揭發部份行山露營朋友公德心原來係有上限之後,有朋友好激動咁「呼籲」大家唔好扮親親大自然去行山露營。嗱,說話就唔係咁講既,只要自律、有公德心同手尾,想喺野外親親邊個點行山點露營都無任歡迎。香港行山露營朋友係點,我就無謂一竹篙打一船人,不過可以分享下一啲個人觀察。

話說小弟都係熱衷扮親親大自然去行山露營既一份子,近年每逢年尾同糧尾都會喺野外迎接新一年既來臨,而今年就選擇西貢昂平。以為要行上山會無乜人,咁諗好明顯輸人輸經驗:沿路上山已經人山人海,上到昂平平原更加以為自己去錯左旺角行人專用區,好在無班大媽喺草地上跳大媽舞或者唱懷舊歌曲。

經過昂平一役之後,我發現果晚行山露營既朋友:

廣告

● 裝備越嚟越世界級,證明香港戶外用品市場肯肯定有增無減。諗住有個營有套cookset可以煮下餐蛋面好威威豬?Sorry,隔離有shelter有燈飾之餘,有檯有凳有埋套好似屋企廚房爐頭既高階煮食套裝玩滿漢全席,簡直給你一個五星級的家。

● 豪華裝備識玩識食,但就係缺乏露營常識,例如以為綁埋垃圾膠袋放喺營出面會乜事都無。佢地無諗過,西貢牛,醒目過我同你:日光日白明目張膽走入人群搵食不特止,仲識揀夜闌人靜眾人熟睡既時份夜襲營區,一袋袋對西貢牛嚟講色香味俱全既垃圾當然無一倖免。西貢牛搜掠過後垃圾遍地,更留低幾篤大小二便揚塵而去,簡直係大自然對大家既絕佳教育。

● 好識隨機應變。好多行山露營朋友為左捕捉新年晨光第一線,得部iPhone都要開住閃光燈當電筒上山一戰;上到山天寒地凍風起雲湧先發現無帶營無帶睡袋?唔緊要,著晒所有衫上身席地而睡,第二朝依然係一條好漢。對我嚟講佢地既行為簡直蔚為奇觀,更加慶幸唔駛幫佢地call白車。

● 好識發揮好客精神。係呢啲大時大節,除左夜闌人靜眾人熟睡既時份用電筒照入人地個營表演「幻彩詠香江」之餘,亦會喺人地營前營後高聲閒話家常,講下逃恥劇情,講下家庭朋友關係,你一句時我一句,務求令周邊所有人短時間認識你全家,並以通頂亢奮狀態迎接二零一七年第一個日出,真係多 謝晒。

所以話,問題實在遠比識唔識帶走自己垃圾為多。大時大節,大家行得山露得營親親大自然都係為左尋開心啫;但行還行露還露親還親,considerate少少醒目少少得唔得先?

廣告

發表意見