立場新聞 Stand News

「關公瞓街記」第四回:踢波與國歌

2017/11/11 — 16:36

話說咖哩羊相约會長偉一眾於球場講數,偉哥點兵點將,數夠七人。由關公守龍門,福祿壽三隻嘢做後衛,偉哥、朱滴及老鬼勝打前鋒,一於採取拉布戰術,拖到夠鐘打和收場。至於啦啦隊,除勝嬸、鄭旦及西施之外,會長偉吹雞找來數名「庶民演藝人協會」台柱,包括熙伯、泉哥、寶山叔…,於是一行十多人,浩浩蕩蕩出發去球場。臨行前,會長偉吩咐關公,總之唔好比個波入左自己龍門,就為之very good啦。

眾人抵達球場,但見七名大漢一字型排開,觀眾看台則有二三十人吶喊助威。領頭的咖哩文指着會長偉鼻子大笑:「咪話阿叔欺負你班騎呢怪,今日場波打和當你赢。如果輸左,則要交個盲妹出來。」盲眼西施冷笑一聲:「本姑娘有名有姓,西施姐都唔稱呼聲,冇家教冇禮貌。算啦,嚤囉差…。弊啦,真係唔好意思,平機會話唔可以咁叫。呀印度兵,小女子睇你個貓樣唔到,所以又點會怕你有牙。」西施牙尖嘴利,氣得咖哩羊七孔生煙。

比赛正式開始,會長偉及老鬼勝平日少運動,朱滴玉樹臨風,三名前鋒全無攻擊力。福祿壽三人儍更更,防守力薄弱,咖喱羊盤球中路直入,大腳抽射,眼看關公呆若木雞企定定,今回冇死啦,一比零包冇走雞。說得遲那時快,關公一拳打出,正中足球,但皮球竟然沒有飛走。何解咁神奇?原來關公使出一指神拳,竟然一嘢插爆左個波。
咖哩羊一眾古惑仔目瞪口呆之餘,觀眾席上鄭旦等人哈哈笑,大聲叫好。於是乎球証換球,並警告關公唔好再整爛個波。會長偉玩嘢,顺便拖延時間,話好似足總冇條咁嘅例。福祿壽半條人命走到索晒氣,趁機休息數分鐘,才不至猝死。

廣告

球証換波後,吹雞再開波。咖喱羊猛攻,福祿壽根本無力招架。說時遲那時快,咖喱羊又再攻門。關公被黄牌警告唔準篤爆波後,又出奇招,只見他大腳一踢,個波直冲雲霄,向茘枝角道方面直飛。個旁証行左九條街,最後在太子弼街執番個波。但咁搞一搞,又冇左好多時間。

個球証其實係黑哨,收左水,於是亂判角球。咖哩文見唔對路,於是打個眼色给隊友,眾人會意。角球開出,六名古惑仔馬上出茅招,唔踢波改為踢人,地堂腿係咁掃。福福壽、偉哥、朱滴及老鬼勝全部中招倒地,痛到呱呱叫。關公久經戰陣,早就見識過拐子馬及地堂刀,地堂腿簡直係濕濕碎。只見他凌雲一跳,如大鵬展翅般,雙腿連踢快如鬼影,既避過六人的攻擊,更將個波踢回對方龍門。咖喱羊一方個門將當場呆左,任由個波入網。於是鄭旦西施一眾馬上起身鼓掌,大聲叫好。

廣告

同一時間,球場邊上忽然奏起國歌。另一看台,廿多名古惑仔觀眾見到自己隊波竟然被入波,當然是嘘聲大作。

說時遲那時快,球場忽然出现幾十支大燈,照向觀眾席上。通州街上空更出現直昇機盤旋。代號「唱歌仔」行動正式展看,只見百多名藍帽子衝入球場,青竹蛇手持大聲公,大大聲叫:「你們已被重重包圍,快此「企定定喺度,得正正喺度」…。」班古惑仔全部身有屎,一見成隊差佬殺到,又聽到「重重包圍」四個字,於是慌忙四散,逃命去也。

經過一番擾攘,咖哩文及其隊友在混亂中逃去無踪,看台上的古惑仔觀眾則全部一網成擒。至於看台另一邊,西施鄭旦等人於奏國歌期間大聲叫好及拍掌,青竹蛇說警方會纪錄在案,將來一定頒個好市民獎云云。

於是警方收隊,關公一眾亦鳴金收兵。返到警署,青竹蛇嗱嗱聲將事件上報一哥,一哥又話比政府高層369知,369知會娥姐,娥姐打比西環,西環急call中港辦,中港辦上奏中央…。於是青竹蛇一夜成名,論功行賞,若干年後被升為副署長。此為後話。

看官,何解咁巧合,通州街球場會忽然奏起國歌?是咁的,話說有個新導演叫杜汶澤,佢套片《空手道》近日上畫叫好叫座。片中首大媽歌《炸炸炸炸炸》更搞到街知巷聞。一眾愛國師奶每朝一早晨運,大唱「國家好我們就會好,我們好國家就會好,如果有一天我不愛國家,太陽就會爆炸炸炸炸…。」。

電影界一向跟紅頂白,於是馬上引來片商搶拍《空手道前傳之陳強啞狗檑台爭霸》。跟風者更認為,「炸炸炸炸炸」一歌咁惦,如果續集唱國歌,咁咪不得了,票房肯定超越《戰狼二》。是夜,通州街球場公園就正係新片開鏡,第一場就拍大媽唱國歌,高高興興的載歌載舞。

發表意見