立場新聞 Stand News

乜帶乜路?

2016/1/14 — 12:04

唔好浪費時間,我單刀直入,究竟梁振英口中的一帶一路是乜西?我嘗試用最簡單的方法去解說,我話嘗試,因為要解釋有中國特色的虛無並唔容易,一帶一路本身就係一項合作發展的倡議同理念,簡單講,即係十劃只係得一兩撇。

無錯,未正識講,大家已經有一種瀨嘢既感覺。

一帶一路乃係我哋偉大的國家主席習近平係2013年9月時提出的經濟合作概念,表面上有60個國家同國際組織響應,涉及的人口有成44億,表面上講緊嘅經濟規模有成21萬億美元,佔全世界63%同埋29%。

廣告

一帶一路入面的一帶,即係「絲綢之路經濟帶」,沿陸路由北京、蘭州、烏魯木齊、哈薩克、吉爾吉斯、烏茲別克,再經過伊朗、土耳其直去俄羅斯、德國、荷蘭、意大利,加強沿路的基礎建設,起下路起下橋同埋起下高鐵咁,好處係可以消化埋中國過剩的產能例如鋼例如水泥咁。

至於一帶一路入面的一路,即係「21世紀海上絲綢之路」,同沿內陸行的一帶唔同,一路係沿海行。由福建等東南沿海地區,殺落廣州、海口、越南、馬來西亞、印尼、印度、斯里蘭卡、非洲、希臘再去返意大利。

廣告

喂,大佬啊,又德國、又荷蘭又哈薩克又非洲咁,講到尾,一帶路要打造嘅係一個政治互信、經濟融合、文化包容的利益命運以至責任共同體,講驚咩,單係雞同鴨講已經唔容易,仲未計南海爭議,美國圍堵同埋土耳其同俄羅斯不和。

有啲人將一帶一路比喻為「中國版馬歇爾計劃」,嘩,啱啱先知一帶一路原來唔係一戴一露,而家又乜叉嘢馬歇爾你唔好講咁深。好簡單,馬歇爾(Marshall)其實係上世紀40年代美國國務卿,當年歐洲係二戰後立立亂,美國要係歐洲做啲嘢,所謂的做啲嘢即係透過財力經濟支持歐洲復甦,慢慢滲透同埋增加影響力,所以大家睇到美國係歐洲係手影處處的。

中國版馬歇爾就係想用返經濟手段去增加中國自己係歐亞以及東南亞地區嘅影響力,要有影響力,要科水嫁。

習近平第一次提一帶一路時,中國嘅外匯儲備增加緊,去到2014年6月有3.99萬億美元,但最近發生咩事大家都好清楚,滬深股市大跌、人民幣貶值加上資金外流,外匯儲備跌到只有3.33萬億美元,中國係14萬億美元企業債同20萬億美元地方債下係咪仲可以咁輕鬆走出去搞一帶一路?

唔知我講乜?我用一個簡單例子,中國諗住自己水多拎去水去救出面無水飲嘅窮人,以為可以收買吓人心咁,但點知未拎啲水出門口就發現屋企火燭,咁你會選擇拎啲水出門口俾班窮人,定留返係屋企救火?

中國唔同美國,唔可以指住自己鼻哥根住無限量印銀紙,短期人民幣只會繼續貶值。習近平係2013年9月提出一帶一路,梁振英係2014年同2015年的施政報告一隻字都無提過,相反財政司司長曾俊華係2015年罕有咁用6段篇幅去重點提及一帶一路、亞洲基建銀行同埋跨境貿易結算、人民幣債券融資等等,關於呢啲財經嘢,梁振英識條鐵!

喂,唔識唔奇丫,孔子都唔係乜都識,古惑仔劉邦都識唔多嘢丫,但佢用人為材,梁振英唔識之餘又剛愎自用,搵個屁股坐係一帶一路督導委員會,扶貧委員會、長遠房屋政策委員會、長遠人口政策委員會又唔見你搵個屎忽坐入去?不過咁都好,令我諗起《大時代》入面方展博的一句:「丁蟹終於踩入嚟我的世界。」

成篇嘢得用一句嘢總結的話係咁 — 梁振英無急市民所急夾硬將香港同中國虛無飄渺嘅所謂一帶一路扣上。

講到呢度,又諗返起擁有《頭條日報》及《星島日報》的星島新聞集團(1105)主席何柱國,事關佢2012年提出的問題一直縈繞著我。「究竟梁振英識唔識經營一家公司?容乜易將來香港由你去管會好似你間戴德梁行咁,一舖清袋?」

香港咁搞,袋就清緊,問題係幾時。

 

PS 本來都唔寫,你唔識經濟唔知咩係人民幣離岸隔夜拆息你唔好搞一帶一路丫嘛,香港係一帶一路主要同惟一的功用就係融資同埋人民幣走出去,睇唔明嘅話可以留言,嫌長可以睇一戴一露。

 

發表意見