立場新聞 Stand News

今日立法會睇真啲

2018/5/7 — 20:31

背景圖片來源:立法會片段截圖

背景圖片來源:立法會片段截圖

唔講咩最黑暗、咩禮崩樂壞啦,跟開立法會已經無咩嚇到我,不過今日立法會一地兩檢個會,確實大開眼界,睇新聞你會見到一堆人鬧鬧鬧、嘈嘈嘈,你話我仆街我話你無聊,事實上通過嗰陣,發生咩事?

話說有3X個修正案要表決,由唔由主席提交上立法會大會,其實要表決咩真係可以唔理,總之,有3X樣野要投票。

主持葉劉突然將陳志全提嘅4樣嘢,夾埋一齊表決,「你唔反對呀嘛」,就咁過咗。咁民主派梗係唔制,嘈咗一輪,葉劉話,好,咁我表決下係咪重新表決陳志全嗰4個表決啦。

廣告

係呀,大定決定下係咪翻兜表決呀,真係咁都得呀,結果梗係唔會啦。

之後就每樣野單獨表決啦,民主派又間或提出下規程問題(即係個會程序有問題),過咗一陣,民主派拎晒啲示威牌出嚟,企晒喺度叫「割地兩檢」。

廣告

正常開會有班人企喺度抗議,你做主持會點?

一、停會,二、趕啲人走,三、換地方再開過。

立法會會議程序都有晒權俾葉劉做呢三樣嘢,結果?葉劉表定唔理繼續表決,於是乎神奇嘅事發生,民主派企喺企不停叫口號,葉劉一輪咀不停講,「而家表決XXX、YYY」、「請核對表決」、「表決完畢宣布結果」,大約用咗10分鐘過晒所有嘢,宣布散會。

民主派有人計過,平均一個表決大概要十幾秒,最快嗰個只係用咗6秒,香港立法會嘅效率應該可以申報健力士世界紀錄啦。

而喺表決期間,由於民主派全程抗議緊,記者就自然企晒喺個會議廳入面影相、拍片,而呢樣嘢根據議事規則係「唔可以」嘅!

不過葉劉無理,因為佢忙緊一輪咀通過晒啲嘢佢,立法會保安無理,佢地忙緊保護葉劉,立法會秘書處都無理,我估原因係,個會都搞到咁啦,仲阻記者影嘢有咩意思呢?

最正係阿執業律師何君堯,喺立法會開緊會期間做Facebook live繼續佢嘅「君事行動」,又係無人理,民主派不停叫規程問題,葉劉無理,係咪佢又係忙緊通過晒啲嘢,直到陳志全衝埋去葉劉先叫停阿執葉律師。

我已經無氣去討論一地兩檢有無法律基礎有無違憲,撇開晒所有政治立場,一個咁樣嘅會議,通過出嚟嘅結果有咩代表性有咩公信力?我肯定中學生開班會都唔會開成咁,但係葉劉就話無問題,你作為市民要守嘅所有法律,都係呢個會通過嘅。

而主持呢個會議嘅人,係立法會議員、行政會議成員,前政府高官葉劉淑儀。

結論:高鐵接通全國,一地兩檢合法合憲,請鼓掌!!!!(by陳帆)

發表意見