立場新聞 Stand News

你唔鍾意就去搭的士

2017/8/22 — 12:27

全國人大常委范徐麗泰

全國人大常委范徐麗泰

久不久,就會在公共交通上遇到一些自私的粉皮,他們不戴耳筒在睇片、聽歌或聽粵曲,據說還有看AV的。當中,很多是欠人教導的小朋友和阿叔阿嬸。

有一次,一個大叔就坐在我後面,大大聲聽舊歌。我坐了一會,忍不住,掉頭跟他說:「先生你可不可以細聲一點?」

這個阿叔抬頭望我一兩眼,一副不以為然的樣子,然後跟我說:「你嫌嘈去搭的士囉,自己揸車囉……」

廣告

很自然,我立即怒從心上起,連珠爆發:「你嘈住我點解係我去搭的士我去揸車?點解唔係你去搭的士揸車?你咁鍾意聽歌,你自己揸車囉,你開到幾大聲都冇人理架?你搭乜嘢巴士呀?成架車邊個好似你咁?係咪全架車啲人都要去揸車遷就你一個呀阿叔。」

個阿叔無法辯駁,只能囁嚅地說:「我冇本事揸車喎……」

廣告

「咁你戴番個耳筒,一係熄咗去啦……」

「我費事理你,我唔同你拗,你呢啲人冇教養……」然後還刻意把音量提高。

「邊有人好似你咁,連啲小朋友都識得安靜唔騷擾人喇……」

個阿叔的辯論方法,非常Chinese!我也很快到站,悻悻然落車,直至落車,個阿叔都冇調低聲浪,臨落車才有另一個乘客幫忙罵了個阿叔幾句。

點解今日講返呢件事呢?因為范太邏輯說:「如果你係唔信,覺得內地政府隨時想破壞『一國兩制』,如果你咁樣諗,最好方法係離開香港。」

呢個邏輯,同啲阿叔騷擾到人畀人話然後叫人去搭的士叫人自己揸車,係一樣的,而且近幾年大行其道。其實呢啲說話,就係講畀呢啲層次嘅阿叔阿嬸聽。一眾所謂大人物,日日同香港人講啲白痴嘢,明明係你班人搞到香港雞毛鴨血,然後同我講你唔鍾意可以走。咁又真係有人信,你睇我遇嗰個阿叔,幾咁理直氣壯,幾咁死不悔改。

唔好話句嘢顛倒黑白,其實叫人移民,根本就係抛你,明知大部分人冇能力,有能力你估冇人走?如果你咁想嘈嘈閉嘅香港人走,你叫啲富豪捐錢,同其他國家傾吓,成立「協助香港人移民基金」,每個想移民嘅資助番一二百萬,一定有好多好多人申請,你敢唔敢面對呢個現實?你梗係唔敢,你淨係識抛之嘛。

作者facebook專頁

發表意見