立場新聞 Stand News

「國歌」這件法寶仲有乜嘢神奇功能?

2018/1/29 — 22:22

受惡劣天氣影響,175 名大陸旅客1月底滯留東京成田國際機場,疑不滿航空公司安排,與地勤人員爆發衝突,又高唱中華人民共和國國歌。(背景圖片來源:網絡片段截圖)

受惡劣天氣影響,175 名大陸旅客1月底滯留東京成田國際機場,疑不滿航空公司安排,與地勤人員爆發衝突,又高唱中華人民共和國國歌。(背景圖片來源:網絡片段截圖)

有啲小問題想求教高人。

我最近俾一兩個本地五毛不斷滋擾,唔知唱國歌有冇用。

廣告

聽講:
一齊唱國歌,可以驅邪趕鬼、降龍伏虎、斬妖除奸;
成日唱國歌,可以長生不老、百毒不侵、起死回生;
經常唱國歌,能令痔瘡縮水、唔再口臭、止癢止痕;
自細唱國歌,令人不怕樣賤、唔會格衰,無懼低能。

國歌令人人都精神爽利,讓全世界俯首稱臣。
國歌功能勁過天圖佈局,威力更勝印度神油。

廣告

國歌是件大法寶,人人唱到嘔白泡。
國歌功效好神奇,個個唱到冇晒腦。
國歌功能可延伸,附加功能可更新。
國歌好處講不完,好利害!我又唱!

不過,
如果普通話唔掂,唱錯可有副作用?
如果廣東話亂唱,上述功能可一樣?
一路拉扯一路唱,可算嚴肅與莊重?
一路衝擊一路唱,返國會否受表揚?
一路鬧事一路唱,會獲大紫荊勲章?

你睇:
京官唱國歌,不怕乞人憎,
高官唱國歌,唔驚咁無能,
市民唱國歌,咪再發𢛴𢛵,
大家唱國歌,領導也變神。

總之,
天天唱國歌,好處多籮籮;
時時唱國歌,包你有得痾;
頻頻唱國歌,埋檯勝賭神;
常常唱國歌,夢想可成真;
密密唱國歌,一齊揾真銀;
日日唱國歌,無需懵仔針;
人人唱國歌,中央好放心。

多謝田漢先生,多謝聶耳先生,
睇到如斯場面,看這般國民質素,
願你們得安息,願你們死得眼閉。

發表意見