立場新聞 Stand News

對廿三條立場與胡官接近一樣,點解狂剷薯片?

2017/2/6 — 16:49

曾俊華

曾俊華

有啲爭拗其實幾無謂,例如話曾俊華lesser evil,反對呢種說法嘅人會認為,咁樣提出嘅人覺得曾俊華一啲都唔evil。大佬,如果係咁,就唔叫lesser evil啦!

lesser evil唔代表佢唔evil,power corrupts,凡政治掌權者都evil,所以民主制度才偉大,所以你去批評曾俊華嘅嘢批評佢嘅政綱,冇問題架喎。

好啦,講23條,由於這是港人心魔,一提就已經失去理性探討的餘地。不過咁,有些事點都要講一講。我去睇返曾的政綱,佢係咁寫嘅:

廣告

我們會汲取2002至2003年立法不成功的經驗,盡力推行23條立法,完成一項維護香港和國家安全,並為港人接受的法例。具體措施包括:

31. 充分諮詢 ─ 必須經過充分的公眾諮詢,包括發表建議條例的「白紙草案」進行諮詢。
32. 消除合理疑慮 ─ 重視政界、傳媒工作者和公眾人士的合理疑慮,在維護國家安全的同時,充分保障公民權利和自由不受侵犯。
33. 先易後難 ─ 立法可按「先易後難」的原則分階段進行,首先處理較少引起爭議的問題。

白紙草案,你幾耐冇聽過白紙草案?白紙草案係咩?在港英時代,政府進行法例諮詢,一般先發出諮詢文件收集意見,文件用白色紙張印製,俗稱「白紙草案」( white bill);討論及修訂後,政府再正式草擬條例草案,因草案以藍色紙印行,故稱「藍紙草案」( blue bill)。「藍紙草案」由行政局通過後刊憲,再交立法局審議,除非經立法局修訂,否則內容不會改變。

廣告

而當年,很多泛民人士係要求用白紙草案諮詢廿三條,而非當日董建華堅持不推白紙直接用藍紙的硬推。當然,時移世易,今日大家係咪因為用白紙草案就會接受,另當別論。

另一個問題係,好多人話應支持胡國興,但胡國興對23條的立場係咁講架喎:

胡國興回應對23條立法的看法,坦言人們雖然未必喜歡聽,但香港的確有責任就此立法。胡國興認為,這是基本法條文當中唯一條文保障「一國」,若果不立法,而中央將國內法律引入香港,情況更悲慘,但其後提到立法「可能唔係而家要做的事」。

佢亦講過,要在政改通過後,才推廿三條。而曾俊華政網亦係政改先於廿三條。兩人對廿三條立場接近一樣,點解今日狂剷薯片,而唔剷胡官仲叫人支持胡官呢?

至於說到「盡力」,也可以想想,當你上司強迫你做一樣好難做嘅事時,你答「我盡力啦」呢一句,係用咩心態?當然你也可視為語言偽術,無問題,但持這種辯論方向的人係必勝的:

(1) 佢今日係扮好人,贏民意,當選後,就會強推廿三條。
(2) 佢今日開誠佈公話你聽會點推廿三條,你都咁蠢支持佢?

「開誠佈公」(狼語,但只說從不做)畀你選前任砌喎?

 

#好易被當超級薯粉 #快啲cap圖第日抽我水

(標題為編輯所擬;原刊於作者 facebook

發表意見