立場新聞 Stand News

小家特首玩薯片

2017/10/23 — 7:02

林鄭月娥在行政長官選舉以777票擊敗曾俊華

林鄭月娥在行政長官選舉以777票擊敗曾俊華

薯片叔叔為港台做義工節目,俾特首辦向港台施壓,港台「領導」要暫停節目宣傳,並對外放風指薯片唔跟規矩申報。規管高官離職就業安排,對於義務工作,屬灰色地帶,冇清楚界線,一般都唔會做到咁寸,勞師動眾一邊叫港台出手對付,另一邊廂吹水用輿論去隊薯片,公眾只會問,薯片同林鄭月娥係咪有十冤九仇?呢件事可從兩面睇,一是私怨,二是政治正確。

林鄭對薯片之私怨,並非源於選舉,而是上屆政府兩條路線鬥爭的延續。林鄭乃689一系,認同老董大有為式施政,搞科技產業大躍進、一帶一路、粵港澳大灣區及擴張政府公共開支派福利;薯片則代表政務官公共理財哲學,小政府大市場。林鄭協助689向財政司奪權,兩人早有嫌隙。從授勳可見,一大棚梁粉高官廢柴都有乜紫荊物紫荊,薯片只攞個太平紳士都要拖到最後一分鐘先畀,真係苦大仇深。

問題今天隊薯片,反映出林鄭政治胸襟窄,作為特首格局太小,廣東話指別人「格衰」,就係林鄭呢款。「格衰」不同「衰格」,前者指姿態小家、唔得體,後者則是指品格低下。政客「衰格」多的是,但多數在公眾面前都會扮到大方得體,因為「衰格」冇人知,「格衰」就路人皆見。作為政客,每做一次決定,總是會計算對自己有冇着數,在公眾眼中得分定失分。今次勞師動眾搞薯片,究竟林鄭月娥背後為乜?公眾自然會懷疑係咪「私怨mode」。薯片一直公開、透明,從事義工活動,協助失明人士組織,如果係揸正嚟做,一早應該大聲喝止,指斥為未經審批之活動,保留追究權利。為何一直唔做?早前傳媒揭發689靜雞雞成立兩間公司:一帶一路及大灣區公司,689事後向政府作出申報,政府信納屬非牟利組織而批准。

廣告

林鄭今天隊薯片,另一原因為了顯示自己公正不阿,對事不對人,689要申報審批、同樣薯片也要,這就是「政治正確」。但問題係689自己搞公司,而公司做乜冇人知,曝光後向政府提交資料時才加上公司非牟利性質的條款,古古怪怪,「格衰」之至。反觀薯片的義工性質,與689完全不一樣,因為主辦機構邀請薯片幫手,是公開活動,透明度高,港台節目做義務嘉賓,其性質會否有利益衝突,一望就知,為何林鄭搞到要大鑼大鼓高調處理?其實係做畀梁振英睇!見微知著,邊個人先至係特區揸fit人?林鄭怕梁振英不滿而去刁難薯片,呢種「政治正確」比「私怨mode」仲得人驚,我寧願相信林鄭「格衰」而砌薯片。薯片風波實際反映出林鄭之小媳婦如履薄冰心態,佢自己講過,周日去政總門口接張超雄請願信都俾人插,認為她敵友不分。

薯片毋須同林鄭鬥小器,大大方方申報,睇睇佢有乜招數,例如不斷索取資料拖延,然後再將林鄭刁難手法公諸於世,咁就玩死佢。施政報告發表後,特首大把正經事要做,好心啦,與其用心思去整人,不如做好推銷政策、緩和政治矛盾工作。如果繼續糾纏在薯片義務工作一事,失分的只有是林鄭,薯片分毫無損,因為佢已經告別政壇,而林鄭仍是要靠民望的政客。

廣告

刊於蘋果日報

發表意見