立場新聞 Stand News

局長邏輯:母語、母乳、腐語、父語

2018/5/3 — 12:24

教育局局長楊潤雄在「京港大學聯盟」成立典禮上致辭。(資料圖片)

教育局局長楊潤雄在「京港大學聯盟」成立典禮上致辭。(資料圖片)

之前某局長認為,「出軌」嘅意思係Affair,容易引起某種聯想,所以唔可以話高鐵「出軌」,只可以話係「甩轆」。

呢個邏輯似乎都唔係講唔通喎(如果你相信陳局長嘅話)。

廣告

根據同一邏輯,「母語」一詞可能會令人聯想到 Breast Milk (母乳),會令心術不正嘅咸濕佬產生情色性嘅遐想。所以,廣東話似乎唔應該叫做「母乳」,而應該叫做「父語」。叫「腐乳」或「腐語」都唔係唔可以考慮,但就絕對不能叫「母乳」。

如果陳局長之前嗰個邏輯似乎都講得通,大家又不妨考慮一下,不但應該承認,仲要高調表明,廣東話係我哋嘅「父語」。

廣告

嗰一位正經嘢唔見佢做,只係不斷做埋D擦鞋仔、蠶蟲師爺式小動作嘅教育局長,可能細個嗰陣時飲咗太多過期變壞咗嘅「母乳」,或者飲咗豬奶當人奶,後果仲嚴重過食咗三鹿奶粉,可能仲週不時要硬食「腐乳」當飲「母乳」,搞到佢唔識乜嘢叫「母語」,只識不斷講埋D無厘頭兼且邏輯不通嘅鬼話,俗稱「腐語」。大家千祈唔好信佢,重千祈唔好同佢客氣,要高調出嚟反對佢。

聲明多一次,廣東話係絕大部份香港人嘅「父語」。事實上,亦係絕大部份香港人嘅「母語」。重駛爭辯?

臨走要帶番個頭盔。絕對無意冒犯眾多偉大嘅母親,一向十分支持餵哺母乳。十分遺憾呢個政府一向以來推動母乳餵哺不力,依家仲要出盡飲奶力想破壞香港人嘅「母語」。有咁嘅政府,有咁嘅局長,係港人嘅不幸。香港社會其中一個最大劫數,正正係有一個咁無恥嘅政府。真係陰毒啲都要講句,鬼唔望佢哋生仔冇奶飲。

 

作者 facebook

發表意見