立場新聞 Stand News

懵懵下

2017/12/18 — 14:44

討論議事規則修改法案期間,有多名非建制派議員被趕離議事堂。

討論議事規則修改法案期間,有多名非建制派議員被趕離議事堂。

【文:心魚】

立法會議事規則的修改於上星期五表決通過,是次的修改魔鬼在細節,魔鬼最中意人懵懵下,但相信好多懵懵下的香港市民到宜家仍然唔知道或者唔明白發生咗啲乜嘢事。

婆婆懵懵下嘅,你可以同佢講:婆婆,立法會改咗議事規則大鑊呀,以後廖嬸佢可以襯你打麻雀小相公改規矩,話以後叫糊要梁師奶先批準喎,仲有去廁所的話一缺三先點人數,就咪就牌照打,會照開,糊照食。

廣告

婆婆:梁師奶同廖嬸真係離譜,當我懵嫁,等我話比其他雀友知先。

阿媽懵懵下嘅,同佢講:阿媽,立法會改咗議事規則大鑊呀,即係好似樓下街市管理署想趕走豬肉佬咁,話就話嫌佢地拉布拉多,實情係唔妥豬肉佬成日呈請投訴。

廣告

阿媽:下,有無搞錯,咁你老豆以後食豆腐火腩煲咪要用冰鮮五花腩!當我懵嫁,無咁好食嫁,等我同管理署理論下先。

二叔公懵懵下嘅,就同佢講:阿叔,立法會改咗議事規則大鑊呀,陸合彩電腦票$20改$35!

二叔公:下!我得廿幾蚊咋!當我懵嫁,我要去陸合彩門口瞓街抗議!

二叔公個仔勤仔:嘥氣啦!瞓街無用嫁,叫口號無很多用嫁!陸合彩廢嫁!勤仔其實係醒目仔,絕對唔係懵懵下,但佢選擇乜都唔做。當佢老豆下次貼中陸合彩但唔夠錢買嘅時候,勤仔應該會話:都話陸合彩廢嫁啦!

若果我係勤仔,我會覺得愧疚,因為我不但咩都無做,仲長他人志氣,滅自己威風。若果我係勤仔,幾無力都好,都唔應該只係放灰,那怕只係同老豆講一聲加油都好。

芸嫂批評瞓街即係做SHOW,但瞓街背後嘅目的唔可以懵懵下唔知。一切都係為咗醞釀輿輪,壯大民意。唔中意瞓街,可以諗吓做啲咩可以達到同樣目的。或者除咗凝聚民心,你仲認為可以做啲咩呢?今時今日,立法會係廢廢地,但唔想佢更廢嘅話,希望沉默的大眾唔好再扮懵,可以幫手喚醒真係懵懵下的大眾,話比佢哋知發生緊咩事,修改咗議事規則會有咩後果。咁下次佢地收到電話民意調查嘅時候,起碼唔會盲目批評拉布,唔會懵懵下支持修改議事規則,自廢武功。

做人只求問心無愧,知嘅唔好扮唔知,唔明嘅唔好扮明,明嘅知嘅就知其不可為而為之,而真係唔知唔明嘅唔緊要,自動去求知就得啦。

立法會「修規之亂」時序懵人包:

建制派與非建制派本來二分天下, 泛民與本土派本同屬非建制,2014年9月雨傘運動後,2016年2月初發生魚蛋革命,本土派崛起,勢如破竹,在2016年2月尾補選期間更似形成天下三分之勢。及後泛民力保不失,守住議席。2016年9月立法會選舉本民前梁天琦參選權遭褫奪,青年新政梁頌恒代為出選勝出,並於10月12日宣誓,卻因未能完成宣誓儀式被取消議員資格,至今先後共有6名非建制派議員因宣誓風波被褫奪議席,非建制派亦因而在2018年3月11日補選前在立法會內失去分組否決權。2017年12月,建制派廖長江提出修訂《議事規則》,以「反拉布」為由大幅改動議規。立法會主席及政府隨即調動大會議程,拉起修規戰戰幔,宣佈在12月13日至18日間加開多天會議直至完成議規修訂為止。會議期間泛民曾呼籲民眾包圍立法會,但民意十分冷淡,12 月15日傍晚,由於多名非建制派議員被逐,廖長江的修訂議案在他本人棄權,陳克勤反對的情況下仍然獲得通過。

發表意見