立場新聞 Stand News

手握權力嘅成年人 總要打壓一班仍會反抗卻又無權在手嘅人

2018/1/29 — 11:51

naosuke ii @ flickr— Attribution 2.0 Generic (CC BY 2.0)

naosuke ii @ flickr— Attribution 2.0 Generic (CC BY 2.0)

忙到傻,連返屋企食餐飯嘅時間都冇。成個禮拜冇好好同囝囝傾過計。

尋晚終於返到屋企,阿仔話,上個星期佢又俾老師選咗做班長。

記唔記得上年做班長嗰陣老豆點教你?

廣告

「記得,你話唔駛靠摘同學名都可以維持到秩序,先算係個好班長吖嘛。」

記得就好啦,咁今次唔使我再教你啦…

廣告

「不過老師話,叫我一見到有同學唔守規矩,就即刻要摘晒啲名,然後交俾佢喎。」然後呢?「然後罰佢地冇得小息同留堂囉。」你唔係跟住做呀?「係呀,咁老師叫吖嘛。上個星期摘咗一堆人呀…」

我心諗,仆街啦,搞乜香港教書嘅,咁鍾意罰啲學生㗎呢?個個train到郁都唔敢郁,對住老師同埋權威人仕成碌葛咁有乜好?習慣咗做碌葛,人生仲有乜前途呀?

仔,老師叫你就跟住做㗎拿?你肯定老師叫你做嘅嘢一定冇錯?「errr…咁唔聽老師話牙?」仔呀,老師又好,老豆又好,記住幾權威嘅都係普通人,唔一定啱㗎。凡事都要諗吓,係咪一定要聽要跟,還是可以用自己嘅方法去做囉。

「即係點呀?」

即係我問你,老師要你摘班同學名,最終目的係乜嘢呀?係為咗要同學俾佢罰,還是想大家秩序好啲呀?「咁梗係想秩序好啲啦!」係囉,摘名只係手段,想秩序好先係目的。如果你有辦法達到目的而用一啲令大家都開心嘅手段,何樂而不為?

阿仔點咗點頭,話自己明喎。我希望佢真係明啦。

我樂觀地相信,小學嘅環境,應該單純一啲吧,所以我話,老師最終嘅目的,係要維持班裡面嘅秩序,而唔係借故懲罰一班同學仔。但我心知,呢個香港社會,往往都唔係咁。手握權力嘅成年人,最終目的,往往只係要打壓一班還會反抗卻又無權在手嘅人,讓自己地位更穩,可以更加橫行。that's the hidden agenda。過程當中,總要喺呢班無權無勢嘅賤民裡面,搵三幾件走狗出嚟幫自己做打手,做醜人…呢啲pattern,自古至今其實都係差不多。

有關做人,當然還有好多要教囝囝。何謂兔死狗烹,可能正是下一個要教佢嘅課題。

 

(原刊於作者 facebook;標題為編輯所擬)

發表意見