立場新聞 Stand News

指全球國會都有人非民選 謝偉俊:攞零票是非常之難 我挑戰你選功能組別 劉慧卿:你都黐線嘅

2017/12/17 — 12:49

劉慧卿與謝偉俊

劉慧卿與謝偉俊

《城市論壇》今日討論修改議事規則後的立法會局面,期間議員朱凱廸提到,今次修改議規,宏觀地看是北京政府如何對待在直選議席中取得過半數議席的民主派,謝偉俊則認為,「你哋以為票多,一定要席位多嘅咩」,又指「全世界國會都一定有部份人不需要人選出來」,「反映返某些階層,比較保守嘅,考慮周詳小小」,又指「無票好難選到,要令到界別無人挑戰你不容易」,他又挑戰前議員劉慧卿選功能組別,「你試下可否攞到零票,零票是非常之難」,劉慧卿則反駁「教壞學生」,「我唾棄嘅嘢,你叫我去選,你都黐線嘅」。

謝偉俊表示:「你哋以為票多,一定要席位多嘅咩,全世界最民主國家如美國都係,希拉莉多過特朗普萬幾萬票,邊個做總統?制度就是制度,見過有車只有加油沒有brake未,未嘛,全世界國會都一定有部份人不需要人選出來,控制返、反映返某些階層、比較保守嘅、為大眾嘅,考慮周詳小小」,主持蘇敬恆即追問「無票會考慮得周詳點?」謝偉俊則指:「無票好難選到,要令到界別無人挑戰你不容易,我選過功能組別,我知道,制度問題,要尊重」。

他又挑戰劉慧卿,「你試下可否攞到零票,零票是非常之難,我兩樣都做過,我清楚知道兩邊點玩法,我挑戰你選功能組票」。

廣告

劉慧卿即回敬:「我選過七屆,未輸過呀,謝偉俊,再選過都得呀,你唔好同我講功能組別呢啲廢話」,「我唾棄嘅嘢,你叫我去選,你都黐線嘅」。

朱凱廸則指,建制派有兩個論點,其一是反民主,不要普及而平等的選舉,其二則是議員不應有力監制政府,應要搞「一黨獨大」、「三權合作」。他又指,民主派第一步要做的,就是要挑戰全體委員會決定這個違反基本法的決定。

廣告

謝偉俊表示,歡迎覆核,「你唔做就唔係朱凱廸」。

 

發表意見