立場新聞 Stand News

搭高鐵去跳大媽舞

2018/5/24 — 22:12

旺角行人專用區終被廢除,一班跳開大媽舞嘅大媽,如喪考妣,唔知點算,唔知仲可以去邊度發揚獨有嘅大媽核突文化。

正如阿叻哥話齋,取消旺角行人專用區,將有十七萬大媽失去舞池,繼而又有十七萬依附大媽舞為生嘅人失業,真係慘無人道。但正所謂「厲害了我的國」,國家發展得咁好,點解唔諗吓返大陸跳呢?

嗱,高鐵就快通車,即使出軌、甩轆、漏水同磨蝕,但只要講一句we are Chinese,高鐵就會乜事都冇。香港政府狂sell一小時生活圈,搭高鐵上大陸「理論上」只係48分鐘車程,嘩,真係好方便呀。咁大媽就可以有兩個選擇,一係響應政府嘅「一小時生活圈」計劃,每日搭高鐵上廣州大跳廣場大媽舞,不亦樂乎?你知啦,香港地少人多,樓價租金瘋狂,搵地真係唔易,就嚟高爾夫球都冇得打,仲跳老舞咩?搭高鐵上去廣州跳,唔單止地大又便利,嗰度啲文化仲同你哋好夾啊。

廣告

第二個選擇,響應馬時亨號召,全部大媽搬去大灣區住,每朝跳完大媽舞,就搭高鐵落嚟返工飲茶shopping,黃昏咪又搭返高鐵上去再跳過囉。嘩,諗起都羡慕你哋。

吓?你話咁樣咪好貴?差唔多六百元來回?你係咪咁睇小自己呀?學呀叻哥話齋,高爾夫球係畀普羅市民打嘅,八百元一次咋,你以為好貴呀?八百元打一次基層都畀得起,你搭六舊水高鐵來往大灣區跳大媽舞話我聽畀唔起?抵你畀叻哥串你白痴啦。

廣告

即係咁囉,依家仲邊有人喺香港跳大媽舞㗎?全部去晒鹽田跳啦。好啦好啦,你咁想喺香港跳,叫黃定光將個廢墟「邊境購物城」改成「邊境跳舞城」,等你哋慢慢跳個飽。

仲唔滿意?咁我諗你要搵議員幫吓你哋手。嗱,我哋立法會有個議員,叫馬逢國,佢掌管「體育、演藝、文化及出版界」呢個界別,咁大媽舞當然係演藝界嘅事吖,咁你班大媽快啲組織去搵佢請願  — 不過記得帶幾支Gel去做見面禮喎。

作者 facebook 

發表意見