立場新聞 Stand News

救鋒十五小時

2016/10/6 — 14:49

圖左三為作者羅冠聰;左一為黃之鋒。香港眾志眾人在黃之鋒稍事休息後,一起用膳(作者提供圖片)

圖左三為作者羅冠聰;左一為黃之鋒。香港眾志眾人在黃之鋒稍事休息後,一起用膳(作者提供圖片)

由(10月5日)早上六點嘅緊急聲明,到夜晚九點完左個記招,奔波左一日,黃之鋒終於順利同我地食到雞煲。呢一日,真係好似救參咁過。

今日早上六點起身知道之鋒未能入境並且失去聯絡,已經立即推晒全日嘅訪問同日程,瘋狂聽電話打電話睇update。基本上,真係世界各地嘅來電湧入黎,就連叫人幫手買嘅麥當勞早餐,都只係飲左杯咖啡,忙到個包同埋薯餅都無時間食,凍晒。

廣告

跟進完入境處,搵埋保安局政助﹑局長辦公室電話,煩左佢地一輪,接左幾個電話同埋節目,已經要準備十一點四面見傳媒。途中,收到楊岳橋嘅慰問同支援,以及 Donna Ya 與 Jonathan Man主動幫手聯絡泰國律師提供協助,都令我地安心唔少,感謝各位。

面見傳媒前,其實,我地一直都收到來至泰國律師﹑人權組織,甚至emirates員工嘅查詢,消息指之鋒可能即日下午被遣返,乘搭emirates唯一一班六點抵港嘅班機番香港。但由於我地無得到泰國政府官方確認,眾志都無公佈流傳嘅之鋒行程。

廣告

事實上,呢份謹慎係正確架。之後,入境處大約一點打番俾我地,原來之鋒提前上香港航空嘅班機,已經飛緊番香港。我地喺一點半確認左之鋒行蹤就參與社記發起嘅示威抗議,遊行左去泰國領事館,感謝各位義友朋友嘅參與施壓。

完左示威,坐的士入機場,打點一切安排,等待之鋒出閘。好慶幸,我地可以順順利利接到之鋒入境,如果佢唔係叫國際上有啲知名度,好可能係下一個桂民海咁失蹤。

之鋒回港,好多文字工作要處理,感謝眾志、聰辦上上下下不停努力,先可以八點鐘開到一個記招,完整咁交代全日事件。未來我將去信、緊急約見保安局局長,要求短期內會晤,問清楚保安局和入境處在此事上角色為何,短期內交代如何保障港人在外地人身安全和人權不受侵犯。同時,我亦會在立法會大會內進行書面質詢,查問保安局對保障港人權利嘅措施,同埋有無相關嘅「黑名單」。

最後,感謝各位關注眾志同之鋒嘅朋友,無大家嘅關注,佢都真係未必咁快出到黎。十五小時過去,番到黎,好好食一餐吧。

 

作者 facebook page

發表意見