立場新聞 Stand News

有一種無恥 叫做工聯會

2018/2/5 — 12:07

圖左:何啟明、圖中:作者提供的何啟明 facebook 帖文、圖右:陸頌雄

圖左:何啟明、圖中:作者提供的何啟明 facebook 帖文、圖右:陸頌雄

工聯會何啟明陸頌雄話條法案係一大進步,因為「僱員在不合理及不合法的情況被解僱後,可由法庭頒發復職權,返回原來工作崗位。」,咁樣,我好想問,如果通過咗條法例,法庭頒左復職令,個僱員仍然返唔到工作崗位,你係咪將條法案同我食左佢呢?

你地梗係唔敢應承啦,因為根本就係度呃緊人,講得清楚啲啦,條法案講到明,就算法庭頒左復職令,老闆都可以「走後門」,只要肯俾多三個月人工(或以72,500元為上限),就唔駛俾個僱員復職,條法例根本就係容許老闆只係需要用錢(好多老闆眼中濕濕碎嘅七萬幾蚊),就可以收買工人嘅復職權!

咁爛嘅法案,工聯會都喺勞顧會應承老闆,仲口口聲聲話係代表工人,係勞資共識,喂,到底你地邊一忽代表緊我地呀?

廣告

都唔好講成個勞顧會嘅選舉方式,根本係由工聯會壟斷晒,剩係講番復職權呢單,你喺勞顧會拍板時,到底有無諮詢過全港工會意見呢?到底有無問過工人想唔想呢?

就係因為你地出賣咗工人,工黨張超雄先要提出修正撥亂反正,令到因為被歧視而解僱嘅大肚婆、工會份子、工傷人士、病患者有權選擇真正嘅復職安排,或者最少提高賠償至六個月人工(金額不設上限),兩者由僱員選擇其一。你地話呢啲合理保障係「破壞勞資雙方得來不易的信任」,你話你地工聯會,到底有邊忽係代表緊工人呀?

廣告

係嘅係嘅,我地係唔應該破壞你地同老闆嘅和諧關係,紮鐵工潮碼頭工潮係咁、侍產假係咁、今次又係咁,呢個確係確係職工盟嘅原罪,但係sorry囉,我地一定會繼續破壞你地同老闆嘅親密關係囉!

 

作者 facebook

發表意見