立場新聞 Stand News

未完場就要打下去 我們還可做的五件事

2018/6/12 — 10:36

頭先收到好多朋友訊息,問,「你絕望未?」

我都有過灰心的一刻,都曾問過係咪真係要走;不過一走了之,於事無補。所以,要好好生活落去。

可以做乜?可以做好多。

廣告

1.捐錢
入獄的義士需要支援,大家可以找不同途徑,我選呢個,至少佢地不會切割,一視同仁
https://www.facebook.com/sparkalliancehk/

2.投票
立法會選舉未到,但未來尚有補選(長毛同劉小麗),下年亦有區議會選舉,雖然龍門不斷搬,但至少仍可用選票幫到更多力量進入議會,最少都可以監察社區。記住「關鍵一席」的教訓,記住邊個賣香港,下次珍惜手上一票。

廣告

3.表態
香港人唔理政治,亦唔識政治,好多人更加係人云亦云。適當場合,仍然可以教導下有機會救到的朋友,或者借社交工具,分享下一啲尸位素餐的議員醜態,或者賣港實錄,一點一滴,總有作用。

4.忍辱
輸了就走,同認輸沒有分別。雨革不果,呢幾年一定會被大力打壓,係最黑暗時機。忍辱負重,繼續生活,如此一來,有需要時先可以再企出來。

5.用間
多啲「支持」民建聯,食多啲,攞多啲,用多啲,幫手做義工,身在曹營,有好多嘢好以做。

我有朋友係教師、有社工、有開餐廳、有開髮型屋,都努力生活,然後搵機會將訊息傳出去。從來革命都不是一代人的事,我哋呢一代做不到,仲有下一代,人人都走,即係放棄香港,即係對中共認輸。

所以我回覆他們,都係話,一日未完場,一日都要踢落去;既然未完場,落後幾多,都未必輸。可能好戇居,但唔好放棄希望。

中共就係要你討厭政治,就係要你絕望。

迎難而上定係放棄?有的只是選擇。

 

(標題為編輯所擬)

發表意見