立場新聞 Stand News

林鄭蜜月期告終 惟有靠派錢

2017/10/9 — 7:38

資料圖片:林鄭月娥

資料圖片:林鄭月娥

特首林鄭月娥周三發表第一份施政報告,估計在首置房屋、交通補貼、利得稅減免、教育撥款同基層醫療方面都會大開水喉。競選時佢狂插曾俊華,提出所謂「理財新哲學」,其實即係開倉派米,唔使再跟「量入為出」。今屆財政司劏房波係梁粉,自然認同派米方向,乜嘢港英時代公共財政紀律,根本不放眼內。問題係即使開倉派米,是否足以扭轉政治失敗造成民望下跌之趨勢呢?

風水佬就呃你十年八年,政治就好快現形,因為有689前車可鑑,政治走極左,以民生對沖,派錢谷民望,根本此路不通,如果得689就唔使提早走人,比林鄭攝上。689失敗,絕對係政治上失敗,以反港獨為名,搞大學、砌學者、郁學生,加上一棚內地控制的紅衞兵組織、新界社團四出生事,黨報打鑼打鼓。香港主流對此種文革式政治極度厭惡,本來林鄭上場,大家以為689一系、鄉黑人物銷聲匿迹,政治上會重新回到中間、溫和,將泛民激進勢力邊緣化。

上任未到百日,根據港大民意研究計劃的民調,林鄭的支持度評分由上任時的新高63.7分,到高等法院裁定四名立法會議員喪失議員資格後,顯著下跌5.2分至58.5分,之後一直在59分至60分徘徊,其後再於香港多間大學出現民主牆「港獨」風波後,明顯下跌2.6分至56.4分,最新調查評分為其上任特首以來的新低。DQ案及十三加三入獄是上手留低手尾,但林鄭政治權謀真正現形,是大學民主牆港獨風波及「殺無赦」事件,紅衞兵、高佬和、何君堯等又再度活躍,呢條以鬥爭為綱的極左勢力,藉反港獨又再蠢蠢欲動,林鄭袖手旁觀。再者林鄭高調表示改善行政立法關係,加碼每月落立法會答問,但另一方面,建制派政黨卻在財委會及大會修改《議事規則》,阻止拉布。表面睇政府好似精神分裂,但睇真啲係互相配合,林鄭走「去政治化」路線,而核突醜怪之政治鬥爭工作就交畀黨委書記、群眾組織及闖將。

廣告

香港人應該睇清楚,林鄭月娥與共產黨特區書記有分工,市長專注民生派錢「民望工程」,扮理性溫和親民,做個好人,對政治工作「不沾鍋」。而政治鬥爭幕後策劃則交中聯辦、建制派及紅衞兵。在大學反港獨運動中,真正向大學校長施壓,逼佢哋集體畫押聯署信件,當然唔會係林鄭。在「殺無赦」事件中,林鄭連「何君堯」三個字提都唔敢提。

問題係這種切割方式有冇用呢?經過689五年來極端管治手法,香港人已學精,唔理你點分工切割,一律算在特首頭上,所以689民望先會創新低。本來根據鐘擺效應,689下台,林鄭理應有一兩年高民望蜜月期,可惜,在呢100日內,她拙劣政治表現令溫和派也失望,無法實現她倡議的施政新風。若果6892.0之惡名短期內扔不開,無論在施政報告有多少錢派,也不會令她得到高民望。短期或會受利民措施刺激而上升,但很快又會再螺旋型下跌。

廣告

因為當香港主流視特首為一個政治上無自主性,是共產黨傀儡的人,此人的政治生命其實已經結束。

原刊於蘋果日報

發表意見