立場新聞 Stand News

葉太都要照稿讀,唔係下嘛?

2016/12/15 — 21:58

葉劉淑儀12月15日召開參選特首記者會

葉劉淑儀12月15日召開參選特首記者會

政綱內容以外,今日葉太手上A3咁大本既講稿就真係Draw晒Fo。

以前上堂成日拎(美國)總統選舉嚟做例子。所有候選人,總係會非常珍惜可以speech-making既機會。Speech-making,幾乎所有嘢都可以度定、設計定、舖排定同埋練習定,可以控制強調乜嘢信息,又可以以最佳形象示人,塑造一副總統戰鬥格。完全唔駛驚好似電視辯論咁,有主持人用尖銳問題攻擊你,挑釁你,搞到你大失儀態;或者隔離候選人無啦啦大叫「你呃人」,搞到你心都亂或者虛埋。

認真,葉太基本上係最有(野)心想做特首既人:由二零一二年想「衝燈」但唔夠飛入閘,到時不時向傳媒流露自己對登上大位既熱情,到而家北大人開綠燈,放人入直路向各路選委爭取提名。見佢咁「一路走來,始終如一」,點都會對佢有少許期望:當然,葉太政治取向好保守或好建制就一定架喇,但見佢行出嚟或者咁想行出黎,大家天真地以為,佢點都會想塑造一個特首格俾自己掛。

廣告

今日搞場誓師大龍鳳,無非都係想借著呢個咁獨家、咁全天候控制既媒體機會,盡情向公眾展視自己有做特首既氣勢同風範。聽完鍾逸傑、田北辰同史泰祖如何以平舖直叙既方式簡介完葉太,現場同網上觀眾(包括我)都諗住「食住花生睇好戲」,睇阿太點樣以「甘蔗既價錢踢出燒鵝既味道」。

殊不知一踏上演講臺,打過三次立會選戰、馳騁議會沙場接近八年、籌謀左特首之位咁多年既葉太,竟然拎出A3咁大本既白色講稿,然後不慌不忙咁照。稿。讀,仲要拎起讀讀到成份施政報告咁,are you kidding me?Body Gesture呢?Eye Contact呢?Rhyme呢?特首戰鬥格呢?為何葉太不是我想像的那樣?

廣告

究竟係阿太選特首定係A3咁大本既講稿選特首,我望唔透。阿太既選舉公關,Perception is everything,時日無多,真係要快啲諗諗佢。

 

發表意見