立場新聞 Stand News

認命認輸才是最黑暗

2016/11/4 — 16:47

所謂「最黑暗一天」呢D字眼係香港都用到爛晒。其實警察出到催淚彈甚至要開槍對乎佔領已經好黑暗,但結果係激發更多人出來上街佔領,成就雨傘運動。

乜野係黑暗呢?認命認輸的一日就最黑暗。一日香港人仲有膽有行動去對抗極權,我地都仲未死得。記得有朋友要申請破產,我都係寄語一句,乜都可以輸,唔可以輸道氣!只要唔認命就可以繼續打落去。

最近到過加拿大,有港僑問,會唔會好灰心?我諗一諗話,係,時勢係好差,社會完全睇唔到希望,甚至講唔出點解香港可以鬥得贏中共。但結果係,我認識好多人正因為環境咁惡劣而行出來。有幾個上位中產朋友,反高鐵時仲潑我冷水話冇野可以做。但到今日,佢地都係專業界別行出來,上電視,做組織,比我走得更前。

廣告

呢D就係希望,就係勝利的可能,就係做人、做香港人個啖氣。我衷心呼籲,泛民、本土、自由派,立即回應人大釋法事件。我地需要比佔領時更大的決心,更大的行動去對抗中共。講自己仲有希望不足夠,一定要同時行動。你有幾多行動,就證明你仲有幾大決心。你有幾大決心,就決定你輸贏。呢個係一個集體行動的時機。只有同心行出來,先仲有得打落去。

我一直有個感覺係,不斷話雨傘冇失敗的人,其實最接受唔到佔領真係衰左,亦對香港民主前途最失望。因為話雨傘冇輸的人,其實冇辦法再去諗下一步。

廣告

我認為當下就係下一步。如果我地夠膽話區選同立法會選舉之成功,見證傘後力量的持續;則人大釋法就係對普遍的民主覺醒的一招重手。當然,雨傘覺醒者不一定係青政支持者,亦不必然支持港獨。但佢地一定支持民主、香港命運自主。越是忠於雨傘覺醒,相信民心思變的人,越應該將人大釋法當成是對傘後政治的打壓。

人大釋法,一方面當然是對司法獨立和法治的衝擊。但更徹底的效果,係要話比你香港人知,所有反抗都係徒然。呢個先係專制政權的管治術,係黑社會兇人的邏輯。

可能有人覺得要等,但真心我唔知仲要等乜。你話要等多D人覺醒?但事實係越大的行動就越令更多人覺醒。你要人覺醒,有乜好得過再有大規模群眾運動?

記得係2014年的六四集會,內地維權律滕彪講到:「我絕不後悔,也絕不後退!因為退無可退。香港,也退無可退。」雨傘後,香港民主未進,卻也沒有退過。但今次人大釋法,係中共自雨傘後第一次進,亦係要香港人退。

朋友,讓我地一齊再上,切勿後退。

(文本無題,題為編輯所擬)

發表意見