立場新聞 Stand News

關於「港獨入學校」的一席話

2016/8/16 — 19:50

有組織曾在銅鑼灣街頭掛上香港獨立的直幡

有組織曾在銅鑼灣街頭掛上香港獨立的直幡

政府近日全方位封殺「港獨」在大學及中學的討論空間,連中聯辦法律部部長也急急出來開腔論斷,說這些東西會毒害香港下一代云云,完全忘了基本法22條列明「中央人民政府所屬各部門、各省、自治區、直轄市均不得干預香港特別行政區根據本法自行管理的事務」去說三道四。

不過我覺得更可怕的,是一些家長發自內心的反對聲音,以下,為小人與某家長不知怎的超展開對話,並稍作資料增修:

問:某家長朋友     答:本人

問:「教師點可以講港獨混淆視聽架?咁係違反《基本法》,犯法架!」
答:「其實呢,將基本法個法同法律個法相提並論先係混淆視聽,《基本法》唔是規範市民的刑法,市民如果違反《基本法》的行為,除非本身為刑法所禁止,否則唔會有法律後果。唔該,《基本法》確立嘅係特區嘅體制同權責,唔係用嚟直接罰市民。」

問:「咁都有教育條例老師要遵守!」
答:「啱。但係條例只係講明,失當行為與否嘅決定權,係喺常務秘書長手上,唔係我同你或者一件屈師太之流可以話事,咁當然宜家連選舉主任都咁大,常務秘書長都可以有好大嘅官威架,佢上司開句聲佢會做咩,邊個知?同埋呢,有老師博客都寫左,係《教育專業守則》有寫明一個專業教育者,係要致力培養學生自由、民主、和平、平等呢啲意識,咁先係PRO喎。」

問:「你哋講呢啲野同教學根本無關係!」
答:「嘩你當通識死架?入大學必修科呀,係通識科六大單元裏面嘅單元二「今日香港」,討論嘅主題就已經包括左「法治和社會政治參與」、「身份和身份認同」,點樣可以唔提呢?唔通你覺得你講港人身份認同果陣可以完全唔提呢個議題?咁同處理六四係有異曲同工之妙呀」

問:「你哋就係識得話係學術自由囉,大哂呀?」
答:「傻啦,邊有野大哂架?你估689咩。學術自由一樣會有佢亦受到制約地方,但係學術自由唔會排除爭議(controversy),因為要有新知識,難免要挑戰一啲已被社會接受嘅觀念作出討論。既然你哋都話港獨係空想無法實踐,咁我研究下一個諗法去造新知識,你做咩咁激動?」

問:「哼,當日反國教你就叻,宜家又為呢啲思想護航。」
答:「你講開呢個就好啦,根據《基本法》第24條,香港特別行政區居民,簡稱香港居民,包括永久性居民和非永久性居民,港人係只有「居民」觀念,同「中國公民」並存,係無「國民」嘅寫法同概念架喎,既然無國民義務,點解要細佬接受國民教育?嗱你呢啲就真係違反基本法啦」

問:「講到尾即係你宜家好BUY港獨啦,好想外力入侵中學校園喎?」
答:「我仲未參透港獨與否喎,所以咪要討論多啲了解多啲囉。呢個地方就係有《基本法》畀嘅學術同言論自由嘛。同埋呢,唔好成日話人地滲透你,啲學生自己會諗架,個事實係好多中學後生仔自發要諗呢條出路呀,因為佢哋睇唔到自己仲有咩出路呀大哥。你組織團體,都要有人信先會加入架係咪?你點解唔諗下,何解佢哋唔讀多啲書搏入大學,或者花時間去捉小精靈,而要咁早走出嚟畀你哋攻擊呢?」

廣告

其實,以懷疑、擔心出發,禁制學校教育的自由,最終做成更大矛盾與反彈的事例早就存在:新疆當地人信奉伊斯蘭教,但中共地方官員早年擔心他們的經文學校會透過「教育」傳播原教旨主義,甚至鼓吹獨立,於是要求這類學校陸續停辦,而新的學校一律要求老師向學生傳播愛國愛黨思想。

最終結果如何?想也有目共睹。

廣告

發表意見