立場新聞 Stand News

關於 3.11 補選:「焦土派」分原則派和仇恨派

2018/3/10 — 12:34

司馬文、區諾軒、范國威、姚松炎

司馬文、區諾軒、范國威、姚松炎

關於明天的補選,我想以一個穿越左中右的角度分析一下各門派立場的因由。2014年才投身社運的我,在雨傘擔任的角色是勇武派,過後因反水客的立場分歧和反對831的後續工作我亦變成了「左膠」陣營的要員之一。後來的區選,因家庭背景和各種原因我亦是少數得到公民黨和民主黨各大佬加持的傘兵。區選後因西柚地區工作,擔任城寨主持,作為列陣創辦成員,我與各區傘兵,自決派的核心也變得非常熟落。魚蛋後的很多很多,我支持「勇武」抗爭,梁游DQ我亦有大力在背後幫手。

唔係話要曬社運CV,不過可以肯定我對各派的立場及政治包袱都非常清楚。

首說持「焦土派」立場的,內分原則派和仇恨派。原則派會投白票或廢票,係因為佢哋唔想用佢哋嘅選票來合理化一個不公平的選舉。本來想投西瓜,蜜桃,就算之後由甘蔗取代西瓜,都喺生果呀,依家你要人食雞胸肉,豆腐,蒸魚,雖然都喺健康,但人地食齋㗎嘛。

廣告

與很多「原則」派重疊的仇恨派本身就已經恨透了泛民。當泛民大佬一次又一次與他們割蓆,他們接受的訊息就係泛民不但不代表我,佢地還會在最後關頭推我去死。三十幾年毫無進取,還要落井下石,對於這群人,泛民不死香港係無得救的。

對於泛民支持者,甚至某些激進民主人士,焦土派是不可理諭的。堅守陣地,是強權壓逼下唯一可取之路,寸步必爭是唯一可取的態度。任何助長對家志氣的事情就等同滅自己威風。

廣告

我們先退一百步來說,今次嘅參選者有兩個喺泛民嘅叛將,另一個喺在議會抗爭及議政都比泛民優越嘅姚老師。

姚松炎被DQ,地方直選再接再勵絕對係不妥協的強硬表現,再者,姚老師本身就唔係泛民,由議政風格到政治定位都屬於自決自強的類本土形態,純姿態方面他的當選無疑是刮了政權一大巴。九西選民絕對應該投票支持。

至於我家住的港島。前文說了我對區諾軒嘅睇法,他是一個有能力,有毅力,心智成熟,總算是個敦厚樸實的真漢子。本來周庭出選,為阿聰攞番被暴政奪去了的那一席,倫理上絕對是名正言順的。但當周庭被DQ後,再由區佬區軒補上。須則區曾是民主黨成員,但經歷過數年的努力,區在公民社會的功勞是 priceless 的。他更是極少數向本土派伸出橄欖枝的泛民議員。更可況佢已經退黨保平安,今次為周庭出來選更是情非得已。他只是想出選保留著雨傘後的政治路線,讓過去三年的工作可以得到延續。

范國威呢個人我唔清楚亦無好感,不過以新東往年的投票結果,佢應該坐定粒六架啦。⋯

總括而言,今次參選的候選人大多數都唔係泛民,要投佢哋唔等於要含。對於泛民支持者,唔該你地唔好再用高高在上嘅姿態話邊個唔投邊個就係鬼,投共,出賣自己云云。呢種打稻草人嘅用語,到最後輸嘅咪又係自己。咁鍾意屌票,不如加入熱狗啦。

我反覆思略過,我決定投1號區諾軒,無他嘅,因為起碼佢願意放低身段及和各方合作。繼續投白票的人,我心裡明白佢哋亦都係經過不少掙扎和思略後才來作出呢個決定,亦值得尊重。

發表意見