立場新聞 Stand News

預算案有幾好 而家真係唔知道

2018/2/28 — 20:55

陳茂波

陳茂波

財政預算案,大家又出嚟評分,有人大讚、又有人話係一舊屎。

好嘅唔係無,例如加醫療開支,預留3000億準備重建同擴建醫院;又例如科500億搞創新科技,呢啲方向絕對正確。

但屎亦在其中。

廣告

例如,唔肯派錢,呢個算啦無論再講,但唔肯全民派錢,又無啦啦派2000蚊俾基層學生,做咩呢?完全唔明。全港市民收6000蚊買iPhone唔得,難道基層學生唔會用2000蚊買iPAD?睇唔透。

更奇妙係過數3億俾海洋公園,換一萬張免費飛,計計埋埋海洋公園淨袋3億,又為咩呢?保育動物、教育學生?咪玩啦。至於點解去海洋公園唔去迪士尼?有人就話,海洋公園主席係孔令成、副主席劉鳴煒、董事張瑞蓮都係林鄭CY競選辦要員,而其實海洋公園保育基本主席陳晴,正正就係陳佐耳個女,點解就你諗你啦。

廣告

不過3億都係小數目,科咗去創科個500億先係大數。睇返條數,過去兩年預算案其實都科咗800億落創科,大家除咗記得楊偉雄真係見過Steve Jobs之外,又做過啲咩呢?

今年個500億,有100億去咗科學園,科學園個主席咁啱係羅范椒芬,唔。另外有200億去咗河套區科技園,記得河套區無?當年CY話河套區可以係「特區中嘅特區」,大陸同胞可以免簽自由出入嗰個河套區呢。

咁呢200億係做咩嘅呢?發展河套區。

係咪熟口熟面?過去幾廿年,香港使咗幾多錢發展咩咩區、物物區,稱之為築巢引鳥,結果巢築咗好多,鳥呢?

呢種起好個硬件等於搞好件事嘅思維,香港人已經中伏多次,擴建醫院都係類似,擴建重建醫院係好,絕對好,病床一直唔夠,但醫生呢?護士呢?醫護人手不足,公私營醫療失衡又點呢,天水圍同大嶼山醫院起好但用唔晒,都係因為唔夠人,又點呢?

海外醫生來港死結一個,加醫護學額杯水車薪,自願醫保到而家都只聞樓梯響。歸根究底,預算案只係政府點洗錢嘅一盤數,錢係死嘅,用咗唔代表有效果,唔用政策配合一齊睇,其實無意義。

不過多年來,香港人加上傳媒都習慣將財政預算案當係派糖分錢開PARTY,政策配合呢家嘢,哈。

又另,今年政府實在太多錢,就左一舊右一舊分晒出去,當中會有幾多俾人過水濕腳A咗去,唔知,教育、醫療、創科,有幾多政策配合,聽聞連吹風嗰班AO都講唔到。

所以話,預算案有幾好,而家真係唔知道,但係屎,就真係有幾舊,仲又大又臭,大概係咁。

 

(標題為編輯所擬;作者 facebook

發表意見