立場新聞 Stand News

DQ案嘅賤格本質 - 今日立法嚟宣佈你尋日違法

2017/7/14 — 18:35

2017年7月14日,高等法院就議員宣誓覆核案頒下判詞,裁定劉小麗、羅冠聰、梁國雄及姚松炎宣誓無效,失去議員資格。當日下午,四人聯同其他非建制派議員召開記者會。

2017年7月14日,高等法院就議員宣誓覆核案頒下判詞,裁定劉小麗、羅冠聰、梁國雄及姚松炎宣誓無效,失去議員資格。當日下午,四人聯同其他非建制派議員召開記者會。

【文:林勉一】

法治精神裡面,其中一個原則係法律不可有追溯性,即係唔可以某個行為尋日冇犯法,然後今日定個法律宣佈你尋日嘅行為係違法再判你有罪。

立法會議員宣誓,過去一直都係由主席裁定無效然後再宣誓,呢個係香港嘅議會慣例。立法會跟議會慣例做事係承繼英式議會制度傳統。包括議員內嘅公眾對於宣誓點先符合《基本法》,本來嘅合理預期係跟議會慣例。

廣告

《基本法》第104條話:「香港特別行政區....立法會議員....在就職時必須依法宣誓擁護中華人民共和國香港特別行政區基本法,效忠中華人民共和國香港特別行政區。」一直以來,點先叫做依法宣誓係由主席裁決、宣誓無效可以重新宣誓,呢個係香港議會慣例。

2016年11月,人大就104條「釋法」,「解釋」《基本法》呢個條文嘅意思係「宣誓人必須真誠、莊重地進行宣誓,必須準確、完整、莊重地宣讀」誓詞,點先叫唔莊重,本身已經好含糊。有把黃傘唔莊重、讀得慢又唔莊重,總之就係佢要DQ邊個,邊個稍為有自己風格宣誓就唔莊重。

廣告

呢下都唔夠賤,呢個「釋法」最賤嘅地方係人大而家先話唔可以再宣誓,要直接DQ。呢個根本唔係釋法,而係人大繞過香港立法會直接「立法」!

大家要知道,《基本法》只係憲制文件,所謂「依法」宣誓,係要依香港本地法例去宣誓。香港本地法例由立法會制訂,呢個係一國兩制裡面高度自治原則。而家人大咁樣變相立法,完全係違反一國兩制、違反香港立法制度。

就退幾千萬步,當係呢個變相立法有效,你11月先加呢個細節落去104條去更改香港一直嘅議會慣例,然後要法院判10月嘅宣誓無效咁去DQ議員,呢個就係違反法治精神不可追溯嘅原則。

人大咁樣變相直接立法、然後法院「依法」追溯過往行為去DQ總共有十幾萬票選出嘅議員。成件事根本就係一炮過摧毀一國兩制、法治精神、程序公義、民選議會制度。成件事係荒謬野蠻到仆街。大家必須認清事實,就係呢個政權點樣對劉曉波,就會點樣對香港,而家就做俾你睇,所以絕對唔可以對中共有任何不必要幻想。呢個咁嘅暴政,遲早有一日會變壽西斯古政權,你睇住嚟。

電影截圖

電影截圖


林勉一
2017.7.14
fb.com/newcolonyhk

發表意見