立場新聞 Stand News

別讓土地盲操縱我們的土地

2017/11/8 — 0:44

舊啟德機場附近,仍然有大片土地空置。(圖片來源:土木工程署網頁)

舊啟德機場附近,仍然有大片土地空置。(圖片來源:土木工程署網頁)

政府委任的土地供應專責小組,今日無條件支持政府5個填海選址方案做土地供應,不停講到棕地、閒置地同短租地好細好難用,沒有意外吧。

5年前政府做過填海市民諮詢,當時有6成人反對填海作為土地供應渠道。今日林鄭委任雷鼎鳴、團結香港基金、發展商代理人、成班專家親信入去幫佢盲目背書護航。專家講話支持全部填海,早前做過嘅公眾諮詢,市民俾過咁多意見,全化垃圾。

廣告

呢種就係最典型嘅林鄭式諮詢,每次都搵一班自己專家協助篩選市民意見,然之後話呢個就係社會共識,日日搵班專家上TVB向公眾洗腦,玩到路人皆見的低手行政政治。

我都好想知其實究竟呢班「專家」識討論啲咩? 一大堆都唔係做土地研究,有啲做土地研究立場親地產商親到唔親。有啲人成日都話造左個餅最終都會分到俾你,你估填完個海啲地最後又會分到你手? 佢地好明顯只係關心點樣造大個餅俾自己,一啲都唔會理個餅點分到去有房屋需要嘅人手上。昔日西九填海區、港珠澳大橋個人工島係個好好例子,啲地分左俾啲富豪地產商啦。

廣告

今日同時討論我地一直研究開嘅短租地,可以充分見到佢地對土地現況有幾唔認真。黃遠輝話短租地好零碎做唔到大發展,得幾千呎,我冇相關資料一睇就睇到塊成5-6公頃咁大嘅短租地俾啲富豪屋苑壟斷左十年啦,你係故意抹黑短租地嘅土地潛力,定係政府冇俾足夠土地資訊你地呀? 又話幫市民搵地,定係純粹為左配合大灣區城市發展戰略定位先揀啲填海選址?

其實我一直最睇唔過眼,係一班根本唔識香港土地現狀,蠢到會用支付寶叫雞嘅所謂學者,統治著自己好清楚點被土地霸權攪到水心火熱嘅香港市民。呢個都係一個好重要原因,點解我地咁努力做好民間土地研究的工作,一路揭開不同類型的土地發展迷思與真象。

發表意見