立場新聞 Stand News

回應王嘉裕 — 誰說賺得少,係因為對社會全無貢獻?

2017/7/28 — 16:53

王嘉裕 facebook video 截圖

王嘉裕 facebook video 截圖

青年才俊王嘉裕在FB上載短片提醒大家:「你賺得少,係因為你對社會全無貢獻!」看後令人驚訝:你是太年輕,太自信,還是太無知了?

就以很多政府部門及企業為例,近年肆意推行外判化,明明員工都做相同工作,人工卻少了一大截。翻查統計資料,1996年政府外判清潔工人只及原本公務員相同職位薪金一半,即使最低工資立法後的今天,也只及七成,按照你的邏輯,點樣解釋外判及原有公務員聘用清潔工人都係做相同工作,社會貢獻卻忽然間減少一大截?

香港最低工資時薪34.5港元,英國最低工資係7.5英磅(相當於約76.5港元),但兩地生活指數相去不遠,你又係咪認為香港清潔工、保安員相較英國同類工人,貢獻一定少好多?或者極其量只及對方的一半?

廣告

記得樂施會曾經有句口號「貧窮源於不公平」。香港GDP媲美發達歐美國家,貧富懸殊卻是全球最嚴重城市,反映社會分配的極大缺陷。好多時候,個人賺到幾多,唔係單靠個人努力,亦往往係社會制度的結果,現在你卻「倒果為因」,完全歸咎於個人能力,不是美化和合理化了每日發生在我們身邊的不公平現象嗎?

在社會上,已有太多老闆和管理階層,每日不斷灌輸工人:「因為你讀書唔夠人多,因為你識得野比人地少、因為你學歷唔夠人高,叫你認命!叫你低頭!叫你唔好諗住可爭取多一些!」又何需你這位青年才俊,再來踩多一腳呢?

廣告

說到底,一剎那光輝唔代表永恆,個人際遇不是自己可以完全掌握。任你出身名門學府,手持灸手可熱學位,一個金融海嘯巨浪衝過來,一樣可能會遭逢失業或裁員命運。以往亦有不少例子,因一時間接受不了人生下滑,本來的天子門生,落得自尋短見的下場。

坊間流行很多激勵課程,我搞工會的「識條鐵咩」,只希望奉勸王嘉裕先生,教人上進之時,亦要教人學習以謙卑的心,面對自己的生命無常,和其他人所遭受的不幸處境。

發表意見